गायिका भूमिका सुब्बाको ‘बनचरी’ सार्वजनिक

 

गोरखापत्र अनलाइन
काठमाडौं, असोज २२ गते । गीतकार, कलाकार तथा सामाजिक अभियन्ता भूमिका सुब्बाको नयाँ भिडियो गीत ‘बनचरी’ सार्वजनिक भएको छ । ओएसआर डिजिटल युट्युब च्यालनबाट गीत बिहिबार रिलिज गरिएको हो ।
गीतमा एउटी नारीको जीव यात्रालाई समेटिएको छ । एउटी छोरीले जन्म दिने आमाप्रति दर्शाउने अगाध प्रेम र माईती गाउँको ‘नोस्टाल्जिया’ गीतमा प्रस्तुत गरिएको गीतकार सुब्बाले बताउनुभयो । सुब्बा आफै गायिका हुनुहुन्छ ।
उहाँको मालिङ्गो सैसै, भूमिका र संगिनी तीनवटा सोलो एल्बम छन् । आधा दर्जनभन्दा बढी सयुक्त गीतिसंग्रह बजारमा आएका छन् । बाल्यकालबाटै कलाकारिता क्षेत्रमा लाग्नुभएकी सुब्बाले खासगरी जनवादी गायिकाको रुपमा परिचय बनाउनुभएको छ ।
गायिका एलिना चौहानको स्वर रहेको गीतमा पछिल्लो समय म्युजिक भिडियोमा सर्वाधिक रुचाईका कलाकार लक्ष्मी बर्देवाको अभिनय रहेको छ । उहाँलाई आमाको रुपमा अञ्जु देउजाले साथ दिनुभएको छ ।
साजन राईको सङ्गीत रहेको यस भिडियोको किरण चाम्लिङ राईले निर्देशन गर्नुभएको छ । बीजू कर्मचार्यले एरेन्ज गरेको यो गीत भर्जिन भ्वाईसको स्टुडियोमा रेकर्ड गरिएको हो । भूपेन्द्र तुम्बाहाङ्गफेले छायाङ्कन गरेको भिडियोमा काठमाडौ उपत्यका छेउछाउँका ग्रामीण दृश्य समेटिएका छन् ।