इसुरु उदानाले अन्तर्राष्ट्रिय क्रिकेटबाट सन्यासको घोषणा गरे

गोरखापत्र अनलाइन
काठमाडौं, साउन १६ गते । श्रीलङ्काली क्रिकेट टोलिका अलराउन्डर इसुरु उदाना अन्तर्राष्ट्रिय क्रिकेटबाट सन्यासको घोषणा गर्नुभएको छ । शुक्रबार क्रिकेट श्रीलङ्कालाई एक पत्र लेख्दै उहाँले सन्यासबारे खुलाउनुभएको छ ।
३३ वर्षीय उदानाले घरेलु क्रिकेट र फ्रेञ्चाइज लिग खेल्न जारी राख्नुहुनेछ । परिवारसँग समय बिताउन उहाँले सन्यासको घोषणा गर्नुभएको बताइएको छ । क्रिकेटप्रति मेरो सधैं र सबैभन्दा बढी स्नेह रहेको र रहीरहने बताउनुहुँदै उहाँले नयाँ पुस्ताका लागि ढोका खोल्न सन्यासको घोषणा गरेको बताउनुभएको छ ।
उदाना श्रीलङ्काली क्रिकेट टोलिको महत्वपूर्ण सदस्यको रुपमा प्राथमिकतामा पर्दै आउनुभएको छ । उहाँले गत् जुन महिनामा इंग्ल्याण्ड बिरुद्धको टी ट्वान्टी अन्तर्राष्ट्रिय जित्नुका साथै भारत बिरुद्धको एकदिबसीय र टी ट्वान्टी श्रृखंला समेत खेल्नुभएको थियो । सन् २०१७ यता उहाँ टोलिमा नियमित हुनुहुन्थ्यो ।
सन् २०१९ मा दक्षिण अफ्रिका बिरुद्धको टी ट्वान्टीमा मात्र ४८ बलमा ८४ रनको अविजित पारी खेलेर उदानाले चर्चा बटुल्नुभएको थियो । गएको तीन महिनामा थिसारा परेरापछि सन्यासको घोषणा गर्ने उदाना श्रीलङ्काली क्रिकेट टोलिको दोस्रो अलराउन्डर हुनुहुन्छ ।