इपीएल टी ट्वान्टीको उद्घाटन खेलमा काठमाडौंले ललितपुरको सामना गर्ने

गोरखापत्र अनलाइन
काठमाडौं, भदौ २४ गते । फ्रेञ्चाइज लिग एभरेष्ट प्रिमियर लिग(इपीएल)को खेल तालिका सार्वजनिक भएको छ । इपीएलले सार्वजनिक गरेको तालिका बमोजिम उद्घाटन खेलमा काठमाडौं किंग्स एलेभनले ललितपुर पैट्रिएटको सामना गर्नेछ ।
सेप्टेम्बरमा २५ बाट सुरु हुने प्रतियोगिताको फाइनल खेल अक्टोबर १९ शनिबारका दिन हुनेछ । तीन सातासम्म चल्ने प्रतियोगितामा कुल १९ खेल हुनेछ । लिग चरणमा कुल १५ खेल हुनेछ । प्रत्येक फ्रेञ्चाइजले लिग चरणमा पाँच खेल खेल्नेछ । सबै खेल कीर्तिपुरस्थित त्रिवि क्रिकेट ग्राउन्डमा हुनेछ ।
विश्व क्रिकेटका महान् खेलाडी क्रिस गेल, शाहीद अफ्रिदी, उपुल थरङ्गा लगायतको उपस्थिति एभरेष्ट प्रिमियर लिगको आगामी संस्करण अत्यन्तै उत्साहप्रद हुने अपेक्षा गरिएको छ । प्रतियोगितामा काठमाडौं किंग्स एलेभन, ललितपुर पैट्रिएट, विराटनगर वरियर्स, चितवन टाइगर्स, भैरहवा ग्लैडिएटर्स, पोखरा राइनोज गरी कुल छ टोली सहभागी हुनेछन् ।