सिरिजमा पाकिस्तानको ‘क्लिनस्विप’

काठमाडौं, मङ्सिर ६ गते । बंगालदेशविरुद्ध तीन खेलको टी–२० क्रिकेट सिरिजमा पाहुना टोली पाकिस्तानले ‘क्लिनस्विप’ गरेको छ । मिरपुरस्थित शेरे बंगला नेशनल स्टेडियममा सोमबार भएको तेस्रो खेलमा पाकिस्तान पाँच विकेटले विजयी भयो । यस जितसँगै पाकिस्तानले सिरजमा ‘क्लिनस्विप’ गरेको हो ।

एक सय २५ रनको विजय लक्ष्य पाएको पाकिस्तानले निर्धारित २० ओभरमा पाँच विकेटको क्षतिमा एक सय २७ रन बनाएको थियो । पाकिस्तानको जितमा हैदर अलीले सर्वाधिक ४५ रन बनाउनु भयो । मोहम्मद रिजवानले ४० र कप्तान बाबर आजमले १९ रन जोड्नुभयो । बलिङमा बंगलादेशका महमदुल्लाहले तीन विकेट लिनुभयो । शोहीदुल इस्लाम र अमिनुल इस्लामले एक एक विकेट लिनुभएको थियो ।

यसअघि पहिले ब्याटिङ गरेको बंगलादेशले निर्धारित २० ओभरमा सात विकेटको क्षतिमा एक सय २४ रन बनाएको थियो । बंगलादेशका लागि मोहम्मद नइमले सर्वाधिक ४७ रन बनाउनुभयो । यस्तै समिम होसेनले २२ र अफिफ होसेनले २० रन बनाउनु भयो । पाकिस्तानका मोहम्मद वासिम र उसमान कादिरले समान दुई दुई तथा सहनवाज दहानी र हरिस रउफले एम एक विकेट लिनुभयो । यसअघि पाकिस्तानले पहिलो खेल चार विकेट र दोस्रो खेल आठ विकेटले जितेको थियो । एजेन्सी