एलपीएलमा शारदा र स्टेपिङ विजयी

काठमाडौँ, फाल्गुन ११ गते । धनगढी मेयर लिटल फ्लावर प्रिमियर लिग (एलपीएल) क्रिकेटमा बुधबार शारदा सरस्वती र स्टेपिङ स्टोन विजयी भएका छन् । जितसँगै शारदाले सेमिफाइनल प्रवेशको सम्भावना कायम राखेको छ । पहिलो खेलमा कञ्चनपुरको शारदा सरस्वती दोधाराले सैनिक आवासीय महाविद्यालय तेघरीलाई एक सय रनले हराएको छ ।

टस जितेर ब्याटिङ गर्ने निर्णय गरेको शारदाले निर्धारित २० ओभरमा सात विकेट गुमाएर एक सय ७० रन बनायो । एक सय ७१ रनको विशाल विजय लक्ष पछ्याएको सैनिक १५ ओभरमा सबै विकेट गुमाएर ७० रन बनाएको थियो । अर्को खेलमा स्टेपिङ स्टोनले सत्यवती माविलाई ३० रनले हरायो ।

टस जितेर ब्याटिङ गर्ने निर्णय गरेको स्टेपिङले निर्धारित २० ओभरमा ६ विकेट गुमाएर एक सय ५७ रन बनाएको थियो । एक सय ५८ रनको विजयी लक्ष पछ्याएको सत्यवतीले १८.४ मा एक सय २७ रनमा समेटिएको थियो । हिमालयन ह्वाइट हाउस, सत्यवती र विद्या भूषण यसअघि नै सेमिफाइनल प्रवेश गरिसकेका छन् । प्रतियोगिताको विजेताले एक लाख ५० हजार र उपविजेताले ७५ हजार रुपियाँ पुरस्कार पाउनेछन् ।