आठ अर्ब १४ करोड राजस्व सङ्कलन

दीपकप्रसाद गौतम

वीरगञ्ज, साउन ९ गते । आन्तरिक राजस्व कार्यालय वीरगञ्जमा गत आर्थिक वर्ष २०७७/७८ मा १५ हजार ६०६ जना नयाँ करदाता थपिएका छन् । आर्थिक वर्ष २०७७/७८ मा तीन हजार ४८१ संस्थागत पान दर्ता, ९४५ मूल्य अभिवृद्धि कर भ्याटमा दर्ता, १० हजार ६९९ व्यक्तिगत पान दर्ता, २२७ अन्तशुल्क दर्ता र २५४ वटा सरकारी निकाय दर्ता भएका छन् ।
अघिल्लो आर्थिक वर्षमा ८७ हजार ४७ करदाता रहेकामा आर्थिक वर्ष २०७७/७८ मा १५ हजार ६०६ जना नयाँ करदाता थपिएसँगै आन्तरिक राजस्व कार्यालय वीरगञ्जको राजस्व सङ्कलनमा योगदान दिने व्यक्ति तथा फर्मको सङ्ख्या एक लाख दुई हजार ६५३ पुगेको सूचना अधिकारी तथा कर अधिकृत हृदयनारायण महतोले जानकारी दिनुभयो ।
आन्तरिक राजस्व कार्यालय वीरगञ्जका प्रमुख कर अधिकृत सुनिलकुमार यादवका अनुसार कार्यालयले बक्यौता कर असुलीका लागि करदाताले मुद्दा फिर्ता लिएर तोकिएको कर तिरेमा त्यसमा लाग्ने अन्य शुल्क जरिवाना मिनाहा गर्ने, २० लाखभन्दा कम कारोबार गर्ने साना करदातालाई लाग्ने करमा ९० प्रतिशत छुट, २० देखि ५० प्रतिशत कारोबार गर्नेलाई ७५ प्रतिशत छुट र ५० देखि एक करोडसम्मको कारोबार गर्नेलाई ५० प्रतिशत छुटको योजना अघि सारेको छ ।
त्यस्तैगरी आन्तरिक राजस्व कार्यालय वीरगञ्ज पर्साले आर्थिक वर्ष २०७७/७८ मा आठ अर्ब १४ करोड २१ लाख एक हजार रुपियाँ राजस्व सङ्कलन गरेको छ ।
आन्तरिक राजस्व विभागले आन्तरिक राजस्व कार्यालय वीरगञ्ज पर्सालाई आर्थिक वर्ष २०७७/७८ का लागि नौ अर्ब ८१ करोड ६८ लाख दुई हजार रुपियाँ राजस्व असुली गर्ने लक्ष्य दिएकामा आठ अर्ब १४ करोड २१ लाख एक हजार रुपियाँ मात्र असुली भएको छ । जुन लक्ष्यभन्दा १७ दशमलव ६ प्रतिशत अर्थात् एक अर्ब ६७ करोड ४७ लाख एक हजार रुपियाँ कम हो । आन्तरिक राजस्व कार्यालय वीरगञ्ज पर्साका सूचना अधिकारी तथा कर अधिकृत हृदयनारायण महतोका अनुसार कार्यालयले लक्ष्यको ८२ दशमलव ०४ प्रतिशत अर्थात् आठ अर्ब १४ करोड २१ लाख एक हजार रुपियाँ असुली गर्न सफल भएको हो ।
आन्तरिक राजस्व कार्यालय वीरगञ्ज पर्साले विभागबाट आयकरतर्फ एक अर्ब ७९ करोड ६२ लाख ६० हजार रुपियाँ असुली गर्ने लक्ष्य पाएको थियो भने आयकरतर्फको लक्ष्यभन्दा ४१ दशमलव ४१ प्रतिशत बढी अर्थात् दुई अर्ब ५३ करोड ८७ लाख ६५ हजार रुपियाँ राजस्व असुली गरेको छ ।
त्यस्तैगरी घरबहाल करतर्फ तीन करोड २९ लाख ५९ हजार, ब्याज करतर्फ चार करोड ९६ लाख २२ हजार, भ्याटतर्फ दुई अर्ब नौ करोड ९० लाख रुपियाँ, अन्तःशुल्कतर्फ तीन अर्ब ४२ करोड १७ लाख ४३ हजार रुपियाँ राजस्व
असुली गरेको छ ।
आन्तरिक राजस्व कार्यालय वीरगञ्ज पर्साले असार महिनामा भने लक्ष्यभन्दा १८ दशमलव ७५ प्रतिशत बढी अर्थात् ९१ करोड ६६ लाख ९४ हजार रुपियाँ राजस्व असुली गर्न सफल भएको सूचना अधिकारी तथा कर अधिकृत हृदयनारायण महतोले गोरखापत्रलाई बताउनुभयो ।
आन्तरिक राजस्व कार्यालय वीरगञ्ज पर्साका प्रमुख कर अधिकृत सुनिलकुमार यादवले पर्सामा सञ्चालनमा रहेकोमध्ये एक ठूलो डिस्टिलरीले उत्पादन बन्द गरेकाले अन्तःशुल्क असुलीमा ५२ दशमलव ७१ प्रतिशत मात्र प्रगति भएकाले समग्र राजस्व असुलीमा १७ दशमलव ६ प्रतिशत कम राजस्व सङ्कलन भएको बताउनुभयो ।
पर्सामा सञ्चालनमा रहेका अरुणोदय र एक्सन वाइन डिस्टिलरी बन्द छन् भने उदयपुर, धौलागिरि र स्नोलैन्ड डिस्टिलरी केही मात्रामा चलेका छन् । तिनीहरूको अन्तःशुल्कमा खासै महत्त्वपूर्ण योगदान नभएको कार्यालयले जनाएको छ ।