योजना आयोगलाई नयाँ र प्रभावकारी ढङ्गले सञ्चालन गरिने

गोरखापत्र समाचारदाता

काठमाडौँ, साउन १५ गते । राष्ट्रिय योजना आयोगका नवनियुक्त उपाध्यक्ष तथा सदस्यहरूले बिहीबारदेखि पदबहाली गर्नुभएको छ । आयोगका अध्यक्ष प्रधानमन्त्री शेरबहादुर देउवासमक्ष पद तथा गोपनीयताको शपथ लिएलगत्तै पदबहाली गर्नुभएको हो ।
आयोगको उपाध्यक्षमा डा. विश्वनाथ पौडेल र सदस्यहरूमा डा. दिलबहादुर गुरुङ र डा. रामकुमार फुयाल नियुक्त हुनुभएको थियो । बाँकी तीन सदस्य नियुक्त गर्न बाँकी नै छ ।
शपथलगत्तै प्रधानमन्त्री तथा आयोग अध्यक्ष शेरबहादुर देउवा र नवनियुक्त पदाधिकारीबीच सङ्क्षिप्त छलफल भएको थियो । छलफलमा आयोगलाई नयाँ र प्रभावकारी ढङ्गले सञ्चालन गर्ने, कोरोना महामारीबाट प्रभावितको उत्थान तथा व्यवस्थापनलगायतका विषयमा ध्यान दिन निर्देशन दिनुभएको सदस्य फुयालले जानकारी दिनुभयो ।
कोरोना महामारी बढिरहेको तेस्रो लहर आउनसक्ने सम्भावनालाई ख्याल गर्दै जनताको जीवन र अर्थतन्त्रलाई सुरक्षित गर्ने दिशामा अहिलेदेखि नै सोच्न थाल्नुपर्ने बताउनुभएको थियो ।