कार्यगत एकताको तयारी

गोरखापत्र समाचारदाता

काठमाडौँ, साउन २० गते । नेपाल उद्योग वाणिज्य महासङ्घ र नेपाल उद्योग परिसङ्घका पदाधिकारीहरूले दुई संस्थाबीच कार्यगत एकता गर्न तयार भएका छन् । परिसङ्घका नवनिर्वाचित पदाधिकारीहरूको सम्मानमा महासङ्घले आयोजना गरेको कार्यक्रममा दुवै संस्थाका पदाधिकारीहरूले सहकार्य गर्नुपर्नेमा जोड दिएका हुन् ।
कार्यक्रममा महासङ्घका अध्यक्ष शेखर गोल्छाले परिसङ्घका पदाधिकारीहरूको स्वागत गर्दै कार्यगत एकताको प्रस्ताव राख्नुभएको महासङ्घद्वारा जारी विज्ञप्तिमा उल्लेख छ । उहाँले निजी क्षेत्रको प्रवद्र्धनका लागि काम गर्न अपरिहार्य भएकाले दुवै संस्थाबीच साझा एजेन्डा तय गरेर अगाडि बढ्नुपर्ने र त्यसका लागि एउटा स्थायी प्रकृतिको संयन्त्र नै निर्माण गरेर जान सकिने धारणा व्यक्त गर्नुभयो ।
कोरोना महामारीबाट मुलुुकको अर्थतन्त्र, उद्योग व्यवसाय कमजोर बनेका समयमा श्रमिक कामदारको तलबको विषय, कृषिमा विदेशी लगानी, बन्दहड्ताल लगायतका विषयमा भएका सहकार्यबाट निकै ठूलो सफलता प्राप्त भएकाले आगामी दिनमा पनि प्राथमिकता तय गरी संयुक्त रुपमा अगाडि बढ्नुपर्ने अध्यक्ष गोल्छाले उल्लेख गर्नुभयो ।
अध्यक्ष गोल्छाले मुलुकको अर्थतन्त्रको विस्तार, रोजगारी अभिवृद्धि, आर्थिक विकास दोहोरो अङ्कमा लैजाने र व्यापार घाटा आधा कटौती गर्ने मुख्य लक्ष्यसाथ महासङ्घले अगाडि सारेको नेट २०३० र परिसङ्घले अगाडि बढाएको मेक इन नेपाल अभियानमा सहकार्यको पहल गर्न पनि आग्रह गर्नुभयो ।
समारोहमा परिसङ्घ नवनिर्वाचित अध्यक्ष विष्णुुकुमार अग्रवालले संस्थागत सहकार्यका लागि महासङ्घले राखेको प्रस्तावमा सहकार्य गर्न आफूहरू तयार रहेको बताउनुभयो । उहाँले आगामी दिनमा प्राथमिकताका क्षेत्रहरू पहिचान गरेर अगाडि बढ्नुपर्ने बताउनुभयो ।
कार्यक्रममा महासङ्घका वरिष्ठ उपाध्यक्ष चन्द्रप्रसाद ढकाल, उपाध्यक्षहरू दिनेश श्रेष्ठ, अन्जन श्रेष्ठ, रामचन्द्र सङ्घई, कोषाध्यक्ष सुुकुुन्तलाल हिराचन, सीएनआईका उपाध्यक्षहरू कृष्णप्रसाद अधिकारी, राजेशकुमार अग्रवाल, वीरेन्द्रराज पाण्डे, राजबहादुर शाह र हेमराज ढकालले अर्थतन्त्रको करिब ७० प्रतिशत हिस्सा ओगट्ने निजी क्षेत्रमाथि अहिले पनि पुरानै मानसिकताबाट हेर्ने दृष्टिकोण रहेकाले यसमा परिवर्तन आवश्यक रहेको बताउनुभयो ।