‘उत्पादन वृद्धि गरेर आयात प्रतिस्थापन’

गोरखापत्र समाचारदाता
काठमाडौँ, साउन ३१ गते । अर्थमन्त्री जनार्दन शर्माले उत्पादन केन्द्रित अर्थतन्त्र निर्माणका लागि गुणात्मक प्रयत्न गर्न निजी क्षेत्रलाई आग्रह गर्नुभएको छ ।
नेपाल उद्योग वाणिज्य सङ्घ काठमाडौँले शनिबार भर्चुअल रूपमा आयोजना गरेको दोस्रो वार्षिक साधारण सभालाई सम्बोधन गर्दै उहाँले उत्पादन वृद्धि गरेर आयात प्रतिस्थापन गर्नेतिर लाग्नुपर्नेमा जोड दिनुभयो । “यसका लागि सामान्य प्रयत्नले हुँदैन,” मन्त्री शर्माले भन्नुभयो, “तपाईंहरूको गुणात्मक प्रयन्त जरुरी छ । ” निर्यातमुखी अर्थतन्त्र निर्माणका लागि उत्पादन वृद्धि गर्नु अपरिहार्य रहेको भन्दै उहाँले यसमा निजी क्षेत्रको सहयोगको आवश्यकता औँल्याउनुभयो ।
सरकारले कोभिड–१९ सङ्कटको प्रभावमा निजी क्षेत्रले राहत महसुस गर्ने गरी सरकारले सघाउने आश्वासन दिनुहुँदै उहाँले भर्खरै सार्वजनिक मौद्रिक नीतिमार्फत सम्बोधन गर्ने प्रयास गरिएको बताउनुभयो । राष्ट्रिय रूपमा आत्मनिर्भर बन्ने अभियानमा लाग्नका लागि निजी क्षेत्रले अपेक्षा गरेका नीतिगत तथा अन्य सुधारका लागि सरकार तयार रहेको उहाँले औँल्याउनुभयो ।
मन्त्री शर्माले अनौपचारिक अर्थतन्त्रलाई औपचारिक अर्थतन्त्रको दायरामा ल्याउनसमेत निजी क्षेत्रको सहयोग रहने अपेक्षा गर्नुभयो । राष्ट्रिय सम्पत्ति कति हो भन्ने कुरा मूल्याङ्कन गरेर वैदेशिक लगानीको लागिसमेत उपयुक्त वातावरण निर्माण गर्ने र राष्ट्रको समग्र पुँजी निर्माण गर्नतिर लाग्नुपर्नेमा समेत मन्त्री शर्माको जोड छ ।
कार्यक्रममा नेपाल उद्योग वाणिज्य महासङ्घका अध्यक्ष शेखर गोल्छाले सरकारले सार्वजनिक गरेको मौद्रिक नीतिले कोभिडपछिको पुनरुत्थान तथा साना एवं मझौला उद्यमको विस्तारमा विशेष ध्यान दिएको भन्दै त्यो सकारात्मक भएको टिप्पणी गर्नुयभयो । उहाँले सरकारको राहत योजना विकसित मुलुकको जस्तो सीधै नगद दिने खालको नभए पनि सुधारमा सहयोगी रहेको टिप्पणी गर्नुभयो ।