यो वर्ष जाडोमा विद्युत माग २६ प्रतिशत बढ्यो

काठमाडौं, पुस ४ गते । न्युनतम् तापक्रम कम भएसँगै विद्युत खपतको दर वृद्धि भएको छ । विद्युत प्राधिकरणको तथ्याङ्क अनुसार यसै सातादेखि २६ प्रतिशतले विद्युत माग बृद्धि भएको हो ।

गत वर्षको मंंसिर २७ गते एक हजार २१७ मेगावाट माग रहेकोमा यस बर्ष एक हजार ५३९ मेगावाट भएपछि गतवर्षको तुलनामा ३२२ मेगावाट अर्थात पिक डिमाण्डमा २६.५ प्रतिशत वृद्धि भएको प्राधिकरणले जनाएको छ । विद्युतको आन्तरिक माग ह्वात्तै बढेसँगै माग धान्न नेपाल विद्युत प्राधिकरणले भारतबाट विद्युत आयत गरेर पनि माग पूर्ति गर्दै आएको प्राधिकरणका कार्यकारी निर्देशक कुलमान घिसिङले बताउनुभयो । यसरी नै खपत वेद्धि भएमा असारसम्ममा पिक डिमाण्ड दुई हजार मेगावाट पुग्ने उहाँले बताउनुभयो ।

विद्युत वितरणका लागि सव–स्टेशनहरु निर्माणमा बृद्धि गरी वितरणलाई प्रभावकारी बनाउँदै विद्युतीय चुल्हो, एयर कन्डिसनलगायत विद्युतबाट चल्ने घरायसी सामानको प्रयोगमा वृद्धि आएपछि खपतमा पनि बृद्धि भएको प्राधिकरणले जनाएको छ । यसअघि प्राधिकरणले नेपालकै ठूलो सिमेन्ट उद्योग होङ्शीलाई ३० मेगावाट विद्युत उपलब्ध गराएको थियो । विद्युतीय गाडीको प्रयोगमा समेत वृद्धि भएको पाइएको छ ।

बर्खाको समयमा आन्तरिक रुपमा उत्पादन भएको विद्युत खपत गर्न नसकी खेर जाने अवस्था आएपछि खपत बढाउन विद्युतीय उपकरणको प्रयोग बढाउने र उद्योगहरुलाई पर्याप्त विद्युत उपलब्ध गराउने नीति प्राधिकरणले लिएको थियो । प्राधिकरणका अनुसार काठमाडौं उपत्यकामा मात्र ९० मेगावाट विद्युत माग बृद्धि भएको छ । गतवर्ष २९३ मेगावाट रहेको काठमाडौं उपत्यकाको पिक डिमाण्ड यस वर्ष ३८२ मेगावाट पुगेको छ । देशभित्र उत्पादित विद्युत आन्तरिक रुपमै खपत बढाउन अल्पकालीन र दीर्घकालीन योजनाअन्तर्गत प्रसारण तथा वितरणतर्फका पूर्वाधार विस्तार तथा सुदृढीकरणलाई उच्च प्राथमिकतामा राखी काम अगाडि बढाइएको घिसिङले बताउनुभयो ।

ऊर्जाका मागका आधारमा मङ्सिर २७ गते विद्युत खपत दुई करोड ७२ लाख युनिट थियो । यो खपत गत वर्षको सोही दिनको दुई करोड ११ लाखको तुलनामा ६१ लाख युनिट बढी हो । उर्जाका आधारमा विद्युत खपत गत वर्षको तुलनामा २८.६५ प्रतिशत बढी हो । विद्युतको माग अहिलेकै रुपमा वृद्धि भयो भने चालु आर्थिक वर्षको अन्त्यसम्ममा दुई हजार मेगावाटको हाराहारीमा पुग्ने प्राधिकरणो आकलन छ ।