कमिसन नपाएको भन्दै पेट्रोल पम्पहरू बन्द

गोरखापत्र समाचारदाता

काठमाडौँ, चैत १९ गते । पेट्रोलियम व्यवसायीले शनिबारदेखि पेट्रोल पम्पहरू बन्द गर्ने भएका छन् । कमिसन कटौतीको विरोधमा नेपाल आयल निगमसँग विभिन्न माग राखेर दबाबमूलक कार्यक्रम गरिरहेका व्यवसायीले शुक्रबार निगमको डिपोबाट हुने ढुवानी वन्द गरेका छन् । निगमको डिपोबाट बिक्रेताका लागि हुने ढुवानी बन्द गरिएको र शनिबारदेखि सबै पम्प बन्द गरिने नेपाल पेट्रोलियम डिलर्स राष्ट्रिय एसोसिएसनका अध्यक्ष लीलेन्द्र प्रधानले जानकारी दिनुभयो । माग पूरा नभएसम्म निरन्तर पम्पहरू बन्द हुने उहाँको भनाइ छ ।
अध्यक्ष प्रधानले भन्नुभयो, “निगमले तीन पटकसम्म मूल्य वृद्धि गर्दा व्यवसायीले पाउँदै आएको कमिसन वृद्धि गरेन । मूल्य वृद्धि गर्दा वृद्धि हुने र घट्दा घट्ने व्यवस्थालाई निगमले तोड्यो माग पूरा नहुँदासम्म सबै पम्प बन्द गर्छौं । ” कमिसन कटौती भएको भन्दै नेपाल पेट्रोलियम डिलर्स राष्ट्रिय एसोसिएसन, नेपाल पेट्रोलियम ढुवानी व्यवसायी महासङ्घ र नेपाल एलपी ग्यास उद्योग सङ्घलगायतले संयुक्त आन्दोलन गर्दै आएका छन् ।

निगमले व्यवसायीलाई पेट्रोलमा प्रतिलिटर ३.३५ प्रतिशत कमिसनको व्यवस्था गरेको छ भने डिजलमा ३.२१ प्रतिशत गरेको छ तर पछिल्लो तीन पटकको मूल्य वृद्धिमा व्यवसायीको कमिसन वृद्धि नगरेपछि आन्दोलित भएका हुन् ।
२०७७ मङ्सिरमा गठन भएको अध्ययन समितिको प्रतिवेदनअनुसार कमिसन निर्धारण गर्नुपर्ने, प्राविधिक नोक्सानी वृद्धिलगायतका माग राखेर व्यवसायीले चैत ५ गतेदेखि आन्दोलन गरेका छन् ।

आन्दोलनका कारण १४ सय ट्याङ्कर र करिब एक हजार बुलेटबाट पेट्रोल, डिजल, मट्टीतेल, हवाई इन्धन र एलपी ग्यासको दैनिक आपूर्ति प्रभावित भएको छ । निगमका अनुसार नेपाली सेना, प्रहरी, सशस्त्र प्रहरी र साझाको पम्प भने खुला हुनेछन् । व्यवसायीसँग पटकपटक छलफल भए पनि निगमले कुनै निर्णय लिन सकेको छैन । इन्डियन आयल कर्पोरेसनबाट नेपाल आयल निगमलाई शुक्रबार प्राप्त मूल्यसूचीमा पेट्रोलियम पदार्थको मूल्य बढेर आएको विज्ञप्तिमार्फत जनाएको छ । नयाँ मूल्यसूचीअनुसार निगमलाई १५ दिनमा करिब पाँच अर्ब २१ करोड रुपियाँ घाटा हुने भएको छ ।