नातिकाजी राष्ट्रिय सम्मान तथा पुरस्कार घोषणा

काठमाडौं, पुष ३ गते । नेपाली मौलिक गीत, संगीतको क्षेत्रमा विशिष्ट योगदान पुर्याउने स्रष्टाहरूलाई २०७७ सालको नातिकाजी राष्ट्रिय सम्मान तथा पुरस्कार घोषणा गरिएको छ ।

नातिकाजी श्रेष्ठको ९७ औँ जन्मजयन्तीका अवसरमा राजधानीमा शनिबार आयोजित सम्मान तथा पुरस्कार घोषणा कार्यक्रममा गरिएको हो । नातिकाजी स्मृति समाजको पुष २ गते बसेको बैठकले सम्मान तथा पुरस्कार सम्बन्धी निर्णय गरेको समाजले जनाएको छ ।

समाजका अध्यक्ष शम्भूजीत बासकोटाका अनुसार, नुपूर बनर्जी भट्टाचार्यलाई नातिकाजी राष्ट्रिय विशिष्ट सम्मान-२०७७ प्रदान गरिने भएको छ । यस्तै, नातिकाजी राष्ट्रिय विशेष संगीत सम्मान-२०७७ बीबी थापा (रचना), नारायण दाश कार्की ढली (वाद्यवादन), शिला पन्त (रचना), सीताराम पोख्रेल (गायन), प्रदिप उपाध्याय (ध्वनी इन्जिनियर), कुन्ती मोक्तान (गायन), प्रभु ढकाल (शास्त्रीय सङ्गीत), हरिभक्त बुढाथोकी (रचना), राजकुमार श्रेष्ठ (सङ्गीत), शितल कादम्बिनी (रचना) र शहदेव ढुङ्गाना (रचना) लाई प्रदान गरिने भएको छ ।

यसैगरी, शिव परियार, निशा देशार, सन्तोष श्रेष्ठ र अरुण तिवारीलाई नातिकाजी राष्ट्रिय सङ्गीत पुरस्कार–२०७७ प्रदान गरिने भएको छ । अर्जुन पोखरेल, सिन्धु मल्ल, अजर जंगम र डिपी दाहाललाई २०७७ सालको नातिकाजी राष्ट्रिय प्रतिभा पुरस्कार प्रदान गरिने भएको छ ।

त्यस्तै, अमृतहिरा तुलाधर योगीलाई नातिकाजी राष्ट्रिय शास्त्रीय सङ्गीत पुरस्कार, एलिस कार्की ढलीलाई नातिकाजी राष्ट्रिय सङ्गीत संयोजक तथा वाद्य पुरस्कार, कृष्ण कँडेललाई नातिकाजी राष्ट्रिय लोक सङ्गीत पुरस्कार र विजयरत्न तुलाधर र दिवाकर मैनालीलाई नातिकाजी राष्ट्रिय कला पत्रकारिता पुरस्कार प्रदान गरिने जनाइएको छ ।