काम सकिएको पाँच महिना बित्दा पनि कामदारले ज्याला पाएनन्  

सिमकोट, पुस २८ गते । खानेपानी उपभोक्ता समितिका अध्यक्षले काममा लगाए तर कामदारलाई ज्याला दिएनन् । आयोजनाका काम सकिएको पाँच महिना बित्दा पनि आफूहरुले ज्याला नपाएको कामदारको गुनासो छ ।

हुम्लाको सिमकोट गाउँपालिका–८ स्थित स्याडामा खानेपानी आयोजना निर्माणका लागि विनियोजन भएको रकम दुरुपयोग भएको पाइएको हो । स्याडा गाउँका करिब २०० स्थानीयवासीले मजदूरी गरी कमाएको रकम उपभोक्ता समितिका अध्यक्षले आफ्नो व्यक्तिगत काममा खर्च गरेको देखिएको छ ।    
    
विसं २०७७ साउनदेखि होपा खानेपानीको काम शुरुआत गरेको पाँच महिना बितिसक्दा पनि कामदारलाई ज्याला नदिएको स्थानीय कामदारको गुनासो छ । समितिका अध्यक्षले स्याडा गाउँका १०० कामदारलाई ज्याला दिएको र अन्यलाई हालसम्म नदिएको स्याडा गाउँका स्थानीयवासी लक्ष्य बुढाले गुनासो गर्नुभयो ।

 गत साउनदेखि काम शुरु गरी भदौमा काम सम्पन्न भएको तर मजदूरी गरेको ज्याला नदिएको बुढाले बताउनुभयो । स्थानीयवासी बुढाका अनुसार कर्णाली प्रदेशको भौतिक पूर्वाधार विकास मन्त्रालयमार्फत खानेपानीका लागि रु ६५ लाख छुट्याएको थियो ।

उक्त रकममार्फत गाउँमा ११ वटा खाने पानीका नयाँ धारा बनाउने भनियो तर खाने पानी उपभोक्त समितिको लापरवाहीका कारण जम्मा नौवटा धारा मात्रै निर्माण गरिएको छ । गाउँमा नौवटा धारा निर्माण गरिएको नाम मात्रै भयो, धारा बनाइयो, तर पानी हालसम्म पनि झरेन यो समस्या जस्ताको तस्तै छ ।    
    
उहाँले भन्नुभयो, “खानेपानीको काम गरेमा पैसा पनि पाइने, पानीको पनि सुविधा हुने भन्ने आशै आशमा काम गरियो । न पानी पिउन पाइयो न त ज्याला नै पाइयो ।” बुढाको जस्तै यहाँका स्थानीयवासीको गुनासो पनि उस्तै छ । उनीहरुका अनुसार धारामा पानी नझरेपछि पुरानै समस्या झेल्नुपर्ने बाध्यता छ । उपभोक्ता समितिका अध्यक्ष बुढालाई कामदारले ज्याला नपाएको विषयमा बुझ्न खोज्दा सम्पर्कमा आउन चाहनुभएन ।