लिभरपुलको सानदार जित

काठमाडौं, मङ्सिर ५ गते । लिभरपुलले इङ्लिस प्रिमियर लिग फुटबलमा सानदार जित निकालेको छ । घरेलु मैदान एनफिल्डमा शनिबार राति भएको खेलमा लिभरपुलले आर्सनललाई ४–० गोलले हरायो ।

एकपक्षीय खेलमा लिभरपुललाई जिताउन साडियो माने, डिएगो जोटा, मोहमद सलाह र ताकुमी मिनामिनोले गोल गर्नुभयो । मानेले ३९औँ मिनेटमा हेडगोल गर्दै लिभरपुलको उत्साह जगाउनुभएको थियो । त्यसपछि दोस्रो हाफमा तीन गोल थपेको लिभरपुलका लागि जोटाले ५२औँ, सलाहले ७३औं र मिनामिनोले ७७औं मिनेटमा गोल गर्दै लिभरपुललाई सजिलै जिताउनुभयो ।

जितसँगै लिभरपुल दोस्रो स्थानमा उक्लिएको छ । लिभरपुलले १२ खेलबाट २५ अंक बनाएको छ । पराजित आर्सनल २० अंक सहित पाँचौं स्थानमा छ । शीर्षस्थानमा रहेको चेल्सीको २९ अङ्क पुगेको छ । शनिबार साँझ भएको खेलमा चेल्सीले लेस्टर सिटीलाई उसैको मैदानमा ३–० गोलले हराएको थियो । एजेन्सी