मच्छिन्द्र ‘ए’ डिभिजन लिगको शीर्षस्थानमा

काठमाडौँ, मङ्सिर २५ गते । साविक विजेता मच्छिन्द्र क्लब शहिद स्मारक ‘ए’ डिभिजन लिगको शीर्षस्थानमा उक्लिएको छ । दशरथ रंगशालामा शनिबार साँझ भएको खेलमा मच्छिन्द्रले हिमालयन शेर्पा क्लबलाई ३–० गोलले हरायो । मच्छिन्द्रको जितमा सुनिल बल, नुर्लान नोभरुजोभ र विमल घर्तीमगरले गोल गर्नुभयो ।

खेलको सुरुवात देखिनै सानदार प्रदर्शन गरेको मच्छिन्द्रले २९औँ मिनेटमा सुनिल बलको गोलमा अग्रता लिएको थियो । सुनिलले नुरेन करिमको पासमा गोल गर्नुभएको हो । त्यसपछि ६८औँ मिनेटमा नुर्लानले गोल गर्दै मछिन्द्रको अग्रता दोब्बर बनाउनुभयो ।

दोस्रो हाफको इन्जुरी समयमा विमलले गोल गर्दै मच्छिन्द्रलाई सानदार जित दिलाउनुभयो । दोस्रो हाफमा मैदान छिर्नुभएका विमलले आन्द्रेस नियाको पासमा गोल गर्नुभएको थियो ।

लिगमा अपराजित यात्रा कायम राखेको मच्छिन्द्रले जितसँगै चार खेलबाट १० अंक बनाएको छ । पराजित शेर्पा दुई अंकसहित १२औँ स्थानमा छ । मच्छिन्द्रका छिरिङ गुरुङ ‘म्यान अफ दी म्याच’ चुनिनुभयो । शेर्पाका उमेश राई ‘इमर्जिङ प्लेयर’ घोषित हुनुभयो ।