च्याम्पियन्स लिग : मेस्सी र रोनाल्डो भिड्ने
काठमाडौँ, मङ्सिर २७ गते । च्याम्पियन्स लिग फुटबलको प्रिवार्टरफाइनलमा इङ्लिस क्लब म्यानचेस्टर युनाइटेडले फ्रेन्च क्लब पेरिस सेन्ट जर्मेन (पीएसजी) प्रतिद्वन्द्वी पाएको छ ।
सोमबार सार्वजनिक गरिएको खेल तालिका अनुसार प्रिक्वार्टफाइनलमा समूह ‘एफ’ को विजेता क्रिस्टियानो रोनाल्डो सम्मिलित टोली म्यानचेस्टर युनाइटेडले समूह ‘ए’ को उपविजेता लियोनल मेस्सी सम्मिलित पीएसजी प्रतिद्वन्द्वी पाएको हो । प्रिक्वार्टरफाइनल खेलको पहिलो लेग आगामी फेब्रुअरी १५ तारिखदेखि सुरु हुनेछ ।
यसैगरी साविक विजेता इङ्लिस क्लब चेल्सीले फ्रेन्च क्लब लिलेसँग प्रतिस्पर्धा गर्नेछ । सर्वाधिक १३ पटकको विजेता स्पेनिस क्लब रियल म्याड्रिडले पोर्चुगिज क्लब बेन्फिका प्रतिद्वन्द्वी पाएको छ । इङ्लिस क्लब लिभरपुलले अष्ट्रियन क्लब साल्जबर्ग र अर्को इङ्लिस क्लब म्यानचेस्टर सिटीले स्पेनिस क्लब भिल्लारियलसँग प्रतिस्पर्धा गर्नेछ ।
यसैगरी जर्मन क्लब बायर्न म्युनिखले स्पेनिस क्लब एट्लेटिको म्याड्रिड, इटालियन क्लब युभेन्ट्सले पोर्चुगिज क्लब स्पोर्टिङ सिपी र इटालियन क्लब इन्टर मिलानले डच क्लब आयाक्ससँग प्रतिस्पर्धा गर्नेछ । एजेन्सी