मच्छिन्द्रलाई फ्रेन्ड्सको आत्मघाती गोल उपहार

काठमाडौँ, पुस २४ गते । शहिद स्मारक ‘ए’ डिभिजन लिगको उपाधि दौडमा रहेको मच्छिन्द्र क्लबले रेलिगेसनको दबाबमा रहेको फ्रेन्ड्स क्लबमाथि कठिन जित निकालेको छ । दशरथ रंगशालामा शनिबार भएको खेलमा मच्छिन्द्रले फ्रेन्ड्सलाई १–० गोलले हरायो ।

मच्छिन्द्रले आत्मघाती गोल सहगोगमा बाजी मारेको हो । बल पोसेसनमा अब्बल देखिएपनि मच्छिन्द्रलाई गोल गर्न निकै संघर्ष गर्नुपरेको थियो । ६८औँ मिनेटमा फ्रेन्ड्सका विदेशी खेलाडी रोनिल एन्थोनी पउलको प्रहार आफ्नै पोस्ट्मा छिरेपछि मच्छिन्द्रको भाग्य खुलेको हो ।

कप्तान सुजल श्रेष्ठको पासमा आकाश राईको हेड प्रहार रोक्ने क्रममा रोनिलको प्रहार आत्मघाती गोलमा परिणत भएको थियो । जितसँगै शीर्षस्थानमा रहेको मच्छिन्द्रले अपराजित यात्रा कायम राखेको छ । मच्छिन्द्रले आठ खेलबाट २० अंक बनाएको छ । समान खेलबाट तीन अंक बनाएको फ्रेन्ड्स अन्तिममा छ । फ्रेन्ड्स जारी लिगमा एउटै जित निकाल्न नसक्ने एक्लो टोली हो ।