दिनेशको गोलमा आर्मी विजयी

काठमाडौँ, पुस २४ गते । विभागीय टोली त्रिभुवन आर्मी क्बलले शहिद स्मारक ‘ए’ डिभिजन लिगमा न्यूरोड टिम (एनआरटी) क्लबमाथि कठिन जित निकालेको छ । दशरथ रंगशालामा शनिबार साँझ भएको खेलमा आर्मीले एनआरटीलाई १–० गोलले हरायो ।

आर्मीको जितमा दिनेश हेन्जनले गोल गर्नुभयो । दिनेशले १७औँ मिनेटमा जगजित श्रेष्ठको पासमा हेडमार्फत गर्नुभएको गोल निर्णायक बनेको थियो । दोस्रो हाफमा आर्मीको लगातार प्रयासलाई एनआरटीका गोलरक्षक अजित प्रजापतिले विफल पार्नुभएको थियो ।

निर्णायक गोल गर्न सफल आर्मीका दिनेश ‘म्यान अफ दि म्याच’ हुनुभयो । उहाँले १० हजार रुपियाँ पुरस्कार पाउनुभयो । ‘इमर्जिङ प्लेयर’ बन्नुभएका एनआरटीका गोलरक्षक अजिले पाँच हजार रुपियाँ प्राप्त गर्नुभयो ।

जितसँगै चौथो स्थानमा यथावत रहेको आर्मीले आठ खेलबाट १४ अंक बनाएको छ । पराजित एनआरटी १० अंकसहित सातौँ स्थानमा यथावत रहेको छ । शीर्षस्थानमा रहेको मच्छिन्द्रको २० अंक छ । दोस्रो स्थानमा रहेको मनाङको १९ र तेस्रो स्थानमा रहेको संकटाको पनि १४ अंक छ ।