चेल्सी र लेस्टर एफए कपको चौथो चरणमा

काठमाडौँ, पुस २५ गते । चेल्सी र लेस्टर सिटी एफए कप फुटबलको चौथो चरणमा प्रवेश गरेका छन् । घरेलु मैदानमा शनिबार राति भएको खेलमा चेल्सीले दोस्रो श्रेणी क्लब चेस्टरफिल्डलाई ५–१ गोलले हरायो । अर्को खेलमा लेस्टरले प्रिमियर लिग प्रतिद्वन्द्वी वाटफोर्डलाई ४–१ गोलले स्तब्ध बनायो ।

चेल्सीको फराकिलो जितमा टिमो वेर्नर, कलुम हड्सन ओडोई, रोमेलु लुकाकु, एन्ड्रियस क्रिस्टेन्सेन र हाकिम जियाचले गोल गर्नुभयो । चेस्टरफिल्डका एकवासी एसान्टेले सान्त्वना गोल फर्काउनुभएको थियो । पहिलो हाफमै चार गोल गरेको चेल्सीले दोस्रो हाफमा एक गोल थपेको हो ।

यसैगरी लेस्टरलाई जिताउन युरी टिलेमान्स, जेम्स म्याडिसन, हार्भे वार्नेस र मार्क अल्ब्राइटनले गोल गर्नुभयो । वाटफोर्डका जोओ पेड्रोले सान्त्वना गोल फर्काउनुभयो । अन्य खेलमा क्रिस्टल प्यालेस, ब्रेन्टफर्ड, ब्राइटन, एभर्टन, साउथह्याम्टन र दोस्रो श्रेणी क्लब क्याम्ब्रिज युनाइटेडले पनि जित निकाल्दै चौथो चरणमा स्थान बनाएका छन् । एजेन्सी