ब्रिगेडसँग बराबरीमा रोकियो पुलिस

काठमाडौँ, पुस २६ गते । विभागीय टोली नेपाल पुलिस क्लबले शहिद स्मारक ‘ए’ डिभिजन लिगमा ब्रिगेड ब्वाइज क्लबसँग बराबरी खेल्दै अंक बाँडेको छ । दशरथ रंगशालामा सोमबार भएको लिगको आठौँ चरणको अन्तिम खेलमा पुलिस ब्रिगेडसँग १-१ गोलको बराबरीमा रोकिएको हो ।

दुवै टोलीले पहिलो हाफमा गोल गरेका थिए । प्रतिस्पर्धात्मक खेलमा सुरुवाती अग्रता ब्रिगेडले लिएको थियो । दोस्रो मिनेटमै ब्रिगेडका रोशन मगरले गोल गर्नुभयो । शिशिर लेखीको प्रहार पुलिसका गोलरक्षक शत्रुधन चौधरीले पन्चगर्दै बचाएपनि सोही रिबाउन्ड बललाई रोशनले जाली चुमाउनुभएको थियो ।

दुई मिनेट लगत्यै पुलिसले बराबरी गोल फर्कायो । बुद्ध तामाङले फ्रिकीकमा गोल गर्दै पुलिसलाई बराबरीमा ल्याउनुभएको थियो । त्यसपछि खेलको अन्तिमसम्म दुवै टोलीले गोलका लागि राम्रा अवर बनाएपनि थप गोल नहुँदा खेल बराबरीमा सकियो ।

ब्रिगेडका अनिल गुरुङ ‘म्यान अफ दि म्याच’ हुनुभयो । उहाँले १० हजार रुपियाँ पुरस्कार पाउनुभयो । ‘इमर्जिङ प्लेयर’ चुनिनु भएका ब्रिगेडकै रोशन मगरले पाँच हजार रुपियाँ प्राप्त गर्नुभयो । लिगमा पुलिसको यो चौथो बराबरी हो। बराबरीसँगै सात अंक बनाएको पुलिस ११औँ स्थानमा छ । ६ अंक बनाएको ब्रिगेड १२औँ स्थानमा छ ।