ब्रेन्टफर्डमाथि साउथह्याम्पटनको सहज जित
काठमाडौँ, पुस २८ गते । साउथह्याम्पटनले इङ्लिस प्रिमियर लिगमा ब्रेन्टफर्डमाथि सहज जित निकालेको छ । घरेलु मैदानमा मङ्गलबार राति भएको खेलमा साउथह्याम्पटनले ब्रेन्टफर्डलाई ४–१ गोलले हरायो ।
साउथह्याम्टनको जितमा जान वेडनारेक, अर्मान्डो ब्रोजा र चे एडाम्सले गोल गर्नुभयो । साउथह्याम्टनले अर्को गोल ब्रेन्टफर्डबाट उपहार पाएको थियो । ब्रेन्टफर्डका भिटाली जानेल्टले सान्त्वना गोल फर्काउनुभयो ।
साउथह्याम्टनले पाँचौँ मिनेटमा सुरुवाती अग्रता लिएको थियो । जान वेडनारेकले गोल गर्दै घरेलु टोलीको उत्साह जगाउनुभयो । २३औँ मिनेटमा भिटाली जानेल्टले गोल गर्दै खेललाई बराबरीमा ल्याउनुभयो । ३७औँ मिनेटमा ब्रेन्टफर्डका अल्भारो फर्नान्डेजले आत्मघाती गोल गरेपछि साउथह्याम्टनले पुनः अग्रता बनायो ।
४९औँ मिनेटमा अर्मान्डो ब्रोजाले गोल गर्दै साउथह्याम्टनको अग्रता थप बलियो बनाउनुभयो । ७०औँ मिनेटमा चे एडाम्सले गोल गर्दै साउथह्याम्टनलाई फराकिलो जित दिलाउनुभयो । जितसँगै २० खेलबाट २४ अंक बनाएको साउथह्याम्टन ११औं स्थानमा उक्लिएको छ । पराजित ब्रेन्टफर्ड २३ अङ्कसहित १३औं स्थानमा छ । एजेन्सी