इटालियन सुपर कप : इन्टर मिलान च्याम्पियन

काठमाडौँ, पुस २९ गते । इन्टर मिलान इटालियन सुपर कपमा च्याम्पियन बनेको छ । घरेलु मैदानमा बुधबार राति भएको खेलमा इन्टरले बलियो प्रतिद्वन्द्वी युभेन्ट्सलाई अतिरिक्त समयमा २–१ गोलले हरायो ।

इन्टरको जितमा लौटारो मार्टिनेज र एलेक्सिस सान्चेजले गोल गर्नुभयो । युभेन्ट्सका वेस्टन म्याकेनीको गोल सान्त्वना गोलमा परिणत भयो । प्रतिस्पर्धात्मक खेलमा सुरुवाती अग्रता युभेन्ट्सले लिएको थियो । २५औँ मिनेटमा वेस्टनले अल्भारो मोराटाको पासमा गोल गर्नुभएको थियो । त्यसपछि ३५औँ मिनेटमा मार्टिनेजले गोल गर्दै खेललाई बराबरीमा ल्याउनुभयो ।

निर्धारित समयमा बराबरीमा सकिएको खेल अतिरिक्त समयमा धकेलिएको थियो । ट्राइब्रेकतर्फ उन्मुख खेलमा इन्टरले अतिरिक्त समयको इन्जुरी समयमा निर्णायक गोल गर्दै उपाधिमा कब्जा जमायो । एलेक्सिस सान्चेजले माटियो डारमेनको पासमा गोल गर्दै इन्टरलाई च्याम्पियन बनाउनुभयो । एजेन्सी