मच्छिन्द्रको पहिलो भेट ब्लु स्टारसँग

काठमाडौँ, माघ ३ गते । नेपालको मच्छिन्द्र फुटबल क्लबले एएफसी कप छनोट प्ले अफको पहिलो खेलमा श्रीलंकाको ब्लु स्टारसँग प्रतिस्पर्धा गर्ने भएको छ । एसियाली फुटबल महासंघ (एएफसी) ले सोमबार सार्वजनिक गरेको तालिका अनुसार पहिलो खेलमा मच्छिन्द्रले ब्लु स्टार प्रतिद्वन्द्वी पाएको हो ।

दक्षिण एसिया क्षेत्रमा रहेको मछिन्द्र र ब्लु स्टारबीचको खेल अप्रलि ५ तारिख दशरश रंगशालामा हुनेछ । यस खेलको विजेताले दोस्रो चरणमा भारतको मोहन बगानसँग जुन १२ तारिख खेल्नेछ । मच्छिन्द्रले शहिद स्मारक ‘ए’ डिभिजन लिगको सातौँ चरणसम्म शीर्षस्थानमा रहेर एएफसी कप छनोट खेल खेल्ने मौका पाएको हो ।

एएफसी कपमा लिग च्याम्पियनने खेल्ने प्रावधान छ । तर एन्फाले यसअघिनै एएफसी क्लब लाइसन्स प्राप्त क्लबमध्ये सातौँ राउन्डसम्मको विजेतालाई छनोट खेलमा सहभागि गराउने निर्णय गरेको थियो । मछिन्द्रले पहिलो पटक एएफसी कप छनोट खेल्न लागेको हो ।

गतबर्ष लिग च्याम्पियन बनेको मच्छिन्द्रले क्लब लाइसन्स नहुँदा एएफसी कप गुमाएको थियो । गतबर्ष मच्छिन्द्रको स्थानमा उपविजेता आर्मीले एएफसी कप छनोट खेल खेलेको थियो ।