स्पेनिस ला लिगा : रियल बेटिसको सानदार जित

काठमाडौँ, माघ ८ गते । स्पेनिस ला लिगाको तेस्रो स्थानमा आसिन रियल बेटिसले स्पान्योलमाथि सानदार जित निकालेको छ । शुक्रबार राति भएको खेलमा बेटिसले १० खेलाडीमा समेटिएको स्पान्योललाई उसैको मैदानमा ४–१ गोलले हरायो ।

रियल बेटिसको जितमा बोर्जा इग्लेसियसले दुई तथा गुईडो रोड्रिग्वेज र जोस विलियसले गोल गर्नुभयो । स्पान्योलका राउल डे टोमसको सुरुवाती गोल सान्त्वना गोलमा परिणत भएको थियो । राउल डे टोसमले १४औँ मिनेटमा गोल गर्दै घरेलु टोलीको उत्साह जगाउनुभयो ।

तर, स्पान्योलको अग्रता लामो समय टिकेन । ३१औँ मिनेटमा बेटिसका बोर्जा इग्लेसियसले पेनाल्टीमा गोल गर्दै खेललाई बराबरीमा ल्याउनुभयो । ३६औँ मिनेटमा गुईडो रोड्रिग्वेजले नविल फेकिरको पासमा गोल गर्दै पहिलो हाफमा बेटिसलाई २–१ गोलको अग्रता दिलाउनुभयो ।

दोस्रो हाफमा पनि सानदार प्रदर्शन गरेको बेटिसले ५३औँ मिनेटमा तेस्रो गोल गरेको थियो । बोर्जा इग्लेसियसले सर्जिओ कानालेसको पासमा गोल गर्दै बेटिसलाई थप बलियो बनाउनुभयो । त्यसपछि ७६औँ मिनेटमा जोस विलियसले नविल फेकिरको पासमा गोल गर्दै बेटिसलाई सहज जित दिलाउनुभयो ।

८१औँ मिनेटमा राउड डे टोमस दोहोरो पहेँलो (रातो) कार्ड पाउँदै बाहिरिएपछि स्पान्योल १० खेलाडीमा समेटिएको थियो । सुरुवातमै गोल गरेको स्पान्योल अन्तमा फराकिलो हार खेप्न बाध्य बन्यो । दुई गोल गर्ने बेटिसका बोर्जा इग्लेसियस ‘म्यान अफ दि म्याच’ हुनुभयो ।

जितसँगै तेस्रो स्थानमा यथावत रहेको बेटिसले २२ खेलबाट ४० अंक बनाएको छ । शीर्षस्थानमा रहेको रियल म्याड्रिडको ४९ अंक छ । एक खेल कम खेलेको सेभिया ४५ अंक सहित दोस्रो स्थानमा छ । पराजित स्पान्योल २७ अंक सहित ११औँ स्थानमा छ । विश्वकै चर्चित लिग मध्यको एक स्पेनिस ला लिगा फुटबल पहिलो पटक नेपालमा डिशहोम एक्सन स्पोर्ट्स एचडी टेलिभिजनले प्रतक्ष प्रशारण गरेको छ । एजेन्सी