बर्नलीसँग बराबरीमा रोकियो युनाइटेड

काठमाडौँ, माघ २६ गते । इङ्लिस प्रिमियर लिग फुटबलको वलियो टोली म्यानचेस्टर युनाईटेड रेलिगेसनको मारमा रहेको बर्नलीसँग बराबरीमा रोकिएको छ । मंगलबार राति भएको खेलमा युनाईटेड बर्नलीसँग १–१ गोलको बराबरीमा रोकिएको हो ।

बर्नलीको मैदानमा भएको प्रतिस्पर्धात्मक खेलमा सुरुवाती अग्रता जोगाउन नसक्दा युनाइटेड अंक बाँड्न बाध्य भयो । युनाइटेडका लागि पाउल पोग्बाले गोल गर्नुभयो । बर्नलीका जय रोड्रीग्वेजले गोल गर्नुभयो । पोग्वाले १८औँ मिनेटमा खाता खोल्नुभएको थियो । रोड्रीग्वेजले ४७औँ मिनेटमा बराबरी फर्काउनुभयो । बराबरीसँगै २३ खेलबाट ३९ अंक बनाएको युनाइटेड पाँचौँ स्थानमा छ । १४ अंक बनाएको बर्नली अन्तिममा छ ।

शीर्षस्थानमा रहेको म्यानचेस्टर सिटीको ५७, दोस्रो स्थानमा रहेको लिभरपुलको ४८, तेस्रो स्थानमा रहेको चेल्सीको ४७ र चौथो स्थानमा रहेको वेस्ट हाम युनाइटेडको ४० अंक छ । मंगलबार रातिनै भएको खेलमा वेस्ट हामले वाटफोर्डलाई १–० गोलले हराएको थियो । वेस्ट हामको जितमा जारोड वोयनले ६८औँ मिनेटमा निर्णायक गोल गर्नुभयो । पराजित वाटफोर्ड १५ अंक सहित १९औँ स्थानमा छ । अर्को खेलमा न्युक्यासल युनाइटेडले एभर्टनलाई ३–१ गोलले पराजित गरेको छ । एजेन्सी