काठमाडौं उपत्यकामा एक हजार २२९ मा सङ्क्रमणको पुष्टि

गोरखापत्र अनलाइन
काठमाडौं, मङ्सिर ४ गते । काठमाडौं उपत्यकामा पछिल्लो चौबीस घण्टामा कोरोनाभाइरसका एक हजार २२९ जना सङ्क्रमित पहिचान गरिएका छन् । स्वास्थ्य तथा जनसंख्या मन्त्रालयले पछिल्लो चौबीस घण्टामा उपत्यकाका तीन जिल्लामा एक हजार २२९ सङ्क्रमित पहिचान गरिएको जनाएको छ ।
मन्त्रालयले कोभिड–१९ सम्बन्धी विवरण अद्यावधिक गर्दै काठमाडौं उपत्यकाका तीन जिल्लामा ५१३ महिला र ७१६ जना पुरुषमा सङ्क्रमणको पुष्टि भएको जनाएको छ । पछिल्लो चौबीस घण्टामा देशैभरि नौ हजार ८०५ नाको आरटीपीसीआर परीक्षण गरिएको छ । जसमध्ये दुई हजार १०३ मा सङ्क्रमणको पुष्टि भएको छ । पछिल्लो चौबीस घण्टामा दुई हजार ८५८ जना सङ्क्रमित निको भएर घर फर्केका छन् ।