दिल्ली सरकारद्वारा एक करोड खोप खरिद गर्न बोलपत्र आह्वान

नयाँदिल्ली, जेठ १५ गते।
भारतको दिल्ली प्रदेश सरकारले कोरोनाभाइरस विरुद्धको एक करोड खोप खरिदका लागि बोलपत्र आह्वान गरेको छ । भारतको केन्द्रीय राजधानी पर्ने दिल्ली सरकारले आपतकालीन “ग्लोबल टेन्टर” आह्वान गरेको अधिकारीहरुले जनाएका छन् ।
जनरल स्वास्थ्य सेवा निर्देशनालयद्वारा प्रकाशित बोलपत्रमा आगामी जुन ७ तारिख बेलुका ५ बजेसम्म बोलपत्रका लागि फाराम भर्न सकिने समयावधि तोकिएको छ ।
भारत सरकारको आधिकारिक निकायले प्रयोगका लागि अनुमति दिएको खोप मात्रै खरिद गर्नुपर्ने बोलपत्रमा उल्लेख गरिएको छ । बोलपत्र इमेलमार्फत भर्न सकिने व्यवस्था गरिएको अधिकारीहरुले जनाएका छन् ।कोरोनाभाइरसको महामारी नियन्त्रण हुन नसकेको र फेरि तेस्रो चरणको महामारी फैलिने खतरा रहेकाले खोप खरिदलाई प्राथमिकता दिइएको प्रदेश सरकारले जनाएको छ ।
केन्द्रीय सरकारको प्रयास र भारतमा उत्पादन भइरहेको खोपले मात्रै तत्कालको आवश्यकता पूरा नहुने भएकाले विश्वाव्यापी बोलपत्र आह्वान गरिएको अधिकारीहरुले जनाएका छन् । कोरोनाभाइरसको महामरी नियन्त्रणको एउटा कडीकै रुपमा खोप खरिद प्रक्रियालाई लिइएको समाचारमा उल्लेख गरिएको छ ।
दिल्ली सरकारका अनुसार अहिले अग्रपंक्तिमा खटिएका स्वास्थ्यकर्मी लगायतका कर्मचारीलाई दुई लाख ६५ हजार १० कोभिसिल्ड खोप उपलब्ध गराइएको छ । त्यस बाहेक दिल्लीका अरु ५२ लाख ६४ हजार २३२ खोप प्रयोग भइसकेको छ ।