बेलायतमा ३८ हजार संक्रमित थपिए, १६७ को मृत्यु

काठमाडौं, भदौ २५ गते।
बेलायतमा एकैदिन कोरोना भाइरसका ३८ हजारभन्दा बढी सङ्क्रमित फेला परेका छन्। पछिल्ला केही दिनयता भाइरसका सङ्क्रमित थपिने क्रम बढ्दै गएको पाइएको छ । शुक्रबार ३८ हजार भन्दा पनि बढी सङ्क्रमित पाइएको बताइएको हो ।
गएको २४ घण्टामा ३८ हजार १३ जना कोरोना भाइरसका नयाँ सङक्रमित थपिएका छन् । यो समेत गरी बेलायतमा सङ्क्रमित हुनेको सङ्ख्या ७१ लाख ३२ हजार ६२ जना पुगेको जानकारी दिइएको छ । गएको २४ घण्टामा १६७ जनाको कोरोनाकै कारण निधन भएको पनि बताइएको छ । लामो समयपछि एकै दिन यतिधेरै मानिसको निधन भएको हो ।
पछिल्ला केही हप्तामा सङ्क्रमित थपिने र मृत्यु हुनेको सङ्ख्या पनि बढेको बताइएको छ । तर धेरै पछि एकै दिन १६७ जनाको मृत्यु भएको स्वास्थ्य अधिकारीले जनाएका छन् । भाइरसबाट एक लाख ३३ हजार ८८१ जनाको मृत्यु भइसकेको छ । पछिल्लो समयमा लकडाउन खुला गरिएको र त्यसपछि पनि भाइरसको सङ्क्रमण बढ्दै गएको पाइएको छ । त्यसैले सरकारले सतर्कता अपनाउन सार्वजनिक सूचना जारी गरिरहेको छ ।