प्रधानमन्त्री नयाँ भवन प्रवेश

गोरखापत्र समाचारदाता

काठमाडौँ, मङ्सिर २८ गते । प्रधानमन्त्री शेरबहादुर देउवा बालुवाटारस्थित नवनिर्मित सरकारी भवनमा सोमबार बिहान गृह प्रवेश गर्नुभएको छ । प्रधानमन्त्री निवास बालुवाटारमा नवनिर्मित भवन प्राङ्गणमा वास्तुपूजा सम्पन्न गरी बिहान ७ बजेर ४१ मिनेटको साइतमा प्रधानमन्त्री देउवा र पत्नी डा. आरजु राणा देउवाले गृह प्रवेश गर्नुभएको प्रधानमन्त्री तथा मन्त्रिपरिषद्को कार्यालय, प्रधानमन्त्री निवास व्यवस्थापन शाखा, बालुवाटारले जनाएको छ ।

गृह प्रवेशपछि नवनिर्मित भवनको पहिलो तलामा निर्माण गरिएको पूजाकोठामा पुगी उहाँहरूले पूजाआजा गर्नुभएको थियो । अहिलेको प्रधानमन्त्री निवासमा भूकम्पले क्षति पु-याएको तथा क्षेत्रफल पनि साँघुरो भएकाले नयाँ भवन निर्माण
गरिएको हो ।