माओवादी केन्द्रीय समितिमा चुनाव केन्द्रित अभियानबारे छलफल हुने

काठमाडौं, फागुन २३ गते । सत्ता साझेदार दल नेकपा (माओवादी केन्द्र)को केन्द्रीय कार्य समितिको बैठक केहीबेरमा बस्दैछ । माओवादीको आठौं महाधिवेशन पश्चात् अध्यक्षबाहेक बाँकी रहेका अन्य पदाधिकारी एवम् कार्यसमितिको पूर्णताका विषयमा बैठकमा छलफल हुने जनाइए पनि आजको बैठकमा यो कुनै पनि विषय प्रवेश नहुने केन्द्रीय कार्यालयका सचिव डोरप्रसाद उपाध्यायले बताउनुभयो ।

‘यसबाहेक कार्यसमितिलाई पूर्णता दिने विषयमा नीतिगत छलफल र निर्णय हुने सम्भावना भने छ । तर आजको बैठकमा चुनाव केन्द्रित दुई महिने अभियानको विषयमा छलफल हुन्छ, उपाध्यायले भन्नुभएको छ ।

बैठक काठमाडौंको बत्तीसपुतलीस्थित अनुपम फुड ल्याण्डमा बस्नेछ । माओवादीको फागुन २० गते शुक्रबार राष्ट्रियसभा गृहमा सुरु भएको केन्द्रीय समितिको बैठक शनिबार थप गृहकार्य गरेर आइतबार बस्ने भनिए पनि स्थगित भएको थियो । यसअघिको बैठकमा माओवादीका नारायणकाजी श्रेष्ठलगायतका नेताहरुले संसदबाट अनुमोदन भइसकेको मिलिनियम् च्यालेन्ज कर्पोरेशन एमसीसी परियोजना सम्बन्धमा फरक मत राख्नुभएको थियो ।

त्यसो त एमसीसी अनुमोदन लगत्तै पार्टी अध्यक्ष पुष्पकमल दाहाल प्रचण्डले एमसीसी अनुमोदनबारे पत्रकार सम्मेलनामार्फत थप कुरा स्पष्ट पार्नुभएको थियो । व्याख्यात्मक टिप्पणीका आधारमा एमसीसी अनुमोदनलाई माओवादी केन्द्रले सकारात्मक रुपमा लिएको छ ।