जसपा कार्यकारिणी समितिको बैठक शुक्रबार बस्दै

काठमाडौं, फागुन ९ गते । जनता समाजवादी पार्टी (जसपा)का अध्यक्ष उपेन्द्र यादवले कार्यकारिणी समितिको बैठक बोलाउनुभएको छ । जसपाका कार्यकारिणी सदस्य इस्तियाक राईले फागुन १३ गते शुक्रबार बिहान ११ बजे कार्यकारिणी समितिको बैठक बस्न लागेको जानकारी दिनुभयो । बैठक पार्टी कार्यालय बालकुमारीमा बस्ने उहाँले बताउनुभयो ।
‘फागुन १३ गते कार्यकारिणी समितिको बैठक बस्ने भन्ने जानकारी इमेलमार्फत प्राप्त भएको छ । बैठक बिहान ११ बजे पार्टी कार्यालय बालकुमारीमा बस्ने छ,’ उहाँले भन्नुभयो ।
उहाँका अनुसार बैठकमा संसदमा टेबल भएको एमसीसी, विधान अधिवेशन र समसामयिक राजनीतिक विषयलगायत स्थानीय तह निर्वाचनका छलफल हुनेछ । यससँगै अहिलेको विधान अनुसार समावेशी र सामूहिक नेतृत्वको विषय पनि एउटा एजेण्डा हो ।