कागती जोनले खुसी छन् रामचन्द्र

गाेकर्ण पाैडेल
तुलसीपुर, जेठ १९ गते । सरकारले आर्थिक वर्ष २०७८/७९को बजेटमा दाङ जिल्लासहित दशवटा जिल्लालाई कागती जोन जिल्लाका रुपमा घोषण गरेपछि कागती किसान रामचन्द्रको मुहारमा खुसी छाएको छ ।

तीन वर्षदेखि तुलसीपुर उपमहानगरपालिका वडा नम्बर १९मा व्यवसायिक रुपमा कागती खेती गर्दै आएका रामचन्द्रलाई बजेटले एकातर्फ निराशा देखाउनेलाई जवाफ मिलेको छ भने अर्कोतर्फ राज्य समेत दाङमा कागती खेती हुन्छ भन्ने सन्देश दिन सफल भएको ठान्नुहुन्छ । बजेटमा दाङ, भोजपुर, काभ्रे, पर्वत, स्याङ्जा, डडेलधुरालगायत दशवटा जिल्लामा कागती खेती विस्तार कार्यक्रम अघि बढाइने उल्लेख गरिएको छ ।

करिब २५ कठ्ठा जग्गा भाडामा लिएर खेती गर्नुभएको रामचन्द्र खडकाले चालिस हजार कागतीका बेर्ना तयार पार्नुभएको छ भने तीस हजार कलमी बेर्नाका लागि तयार पार्दै हुनुहुन्छ ।

‘‘म धेरै पल्ट धाउँदा विज्ञहरुबाटै दाङमा पनि कागती खेती हुन्छ भन्ने प्रश्न उठाइएकोमा अब राज्यकै ध्यान जाँदा पक्कै हामीजस्ता किसानहरुलाई थप उर्जा मिलेको छ ।’’ खडकाले भन्नुभयो ।

कागतीको बिरुवा नेपालका विभिन्न जिल्लासहित छिमेही देश भुटानबाट समेत माग आएकाले बन्दाबन्दी खुलेलगत्तै त्यहाँ विरुवा पठाउने प्रक्रिया अघि बढाइने उहाँले बताउनुभयो ।

उहाँले भन्नुभयो ‘भुटानका किसानहरुले परीक्षणका लागि एक हजार विरुवा माग गर्नुभएको छ, बन्दाबन्दी खुकुलो भएलगत्तै पठाइनेछ’ । करिब आठ वर्ष जनयुद्व लड्नुभएका खड्का पाँच वर्ष विदेशमा रोजगारी गरेपछि स्वदेशमै केही गराैँ भन्ने उद्देश्यका साथ तीन वर्षदेखि कागती खेती गर्दै आउनुभएको छ । कागतीको बेर्नाले डेढ वर्षबाटै फल दिन शुरु गर्ने उहाँ बताउनुहुन्छ ।