राजमार्ग मर्मत नहुँदा नागरिकलाई सास्ती

जनार्जन खत्री
सर्लाही, असोज ८ गते । सर्लाही खण्डको पूर्व–पश्चिम राजमार्ग मर्मत नहुँदा स्थानीय नागरिकलाई सास्ती भएको छ । राजमार्गको दर्जनौँ स्थानमा ठूल्ठूला खाल्डो परेका छन् । जिल्लाको चापिनी र लखन्देही खोलाको पुल समेत जिर्ण छ । राजमार्ग र पुलमा बनेका खाल्डाखुल्डीले सवारी दुर्घटना बढिरहेको स्थानीयको भनाई छ ।

सर्लाहीको पूर्बी सीमना बाँके खोलादेखि पश्चिम बागमती खोलासम्मकै राजमार्ग अत्यन्त खराब बनेको स्थानीयको गुनासो छ । खाल्डो छल्नेक्रममा सवारी साधन ठोक्किने गरेको उहाँहरुको भनाई छ । चौबिसै घण्टा ब्यस्त हुने राजमार्ग खराब हुँदा मोटरसाइकल, कार, जीपजस्ता सानाखाले सवारी सबैभन्दा बढी प्रभावित भएका छन् ।

सर्लाहीका ट्राफिक प्रहरी निरीक्षक केदारमान दोङले चाडपर्व नजिकिँदै गर्दा सवारीको चाप बढ्दै गएपनि सडकको अवस्था जिर्ण रहेको बताउनुभयो । “चाडपर्व नजिकिएसँगै सडकमा सर्वसाधरण र सवारीको चाप बढेको छ, तर सडकको अवस्था बिग्रदो छ,” ट्राफिक प्रहरी निरीक्षक दोङले भन्नुभयो, “यसले सवारी दुर्घटनाको जोखिम अझै बढेको छ ।”

सडकमा जति सवारीको चाप बढ्यो, दुर्घटनाको जोखिम पनि उत्तिनै हुने ट्राफिक प्रहरी निरीक्षक दोङले बताउनुभयो । खाल्डो परेका केही स्थानमा माटो र गिट्टी बालुवा हालेर पुर्ने काम भएको उहाँले बताउनुभयो । सडक डिभिजन कार्यालय चन्द्रनिगाहपुरले दशैँअघि नै पूर्व–पश्चिम राजमार्ग मर्मतको काम गरिने जनाएको छ । कार्यालयका प्रमुख नरेशप्रसाद केशरीले रौतहटतर्फबाट सडक मर्मतको काम सुरु भइसकेको र दुई–चार दिनभित्रै सर्लाही खण्डको काम पनि सुरु हुने बताउनुभयो ।

उहाँकाअनुसार सडक मर्मतका लागि विश्व बैङ्कद्वारा ठेक्का लागेकाले ठेकेदारमार्फत नै काम गरिने बताइएको छ । “ठेकेदारमार्फत रौतहटबाट काम सुरु भइसकेको छ, अब केही दिनभित्रै सर्लाही खण्डको पनि काम सुरु गराउछौँ,” सडक डिभिजन कार्यालयका प्रमुख केशरीले भन्नुभयो, “दशैँ अघिसम्म सडकका खाल्डाखुल्डी पुरिसक्छौँ ।”