सल्यानमा जिप दुर्घटनामा एकको मृत्यु, सात घाइते

प्रतीक इच्छुक शर्मा
सल्यान, कार्तिक ७ गते । सल्यानमा जिप दुर्घटना हुँदा एक जनाको मृत्यु भएको छ भने सात जना घाइते भएका छन् । दुर्घटनामा परी जिल्लाको बागचौर नगरपालिका निवासी १८ वर्षीय आशीष बस्नेतको ज्यान गएको छ । बिहान करिब ७ः५० बजे सल्यानको बागचौरबाट दाङतर्फ गइरहेको भे. १ च १८९० नम्बरको बोलेरो जीप राप्तीलोकमार्गको कपुरकोट ३ स्थित मूलपानी बनस्पति उद्यान नजिकै दुर्घटनामा परेको हो ।
जिल्ला प्रहरी कार्यालय सल्यानका प्रवक्ता अर्जुन पौडेलले दुर्घटनामा घाइतेहरुको उपचार प्रादेशिक अस्पताल तुलसीपुरमा भइरहेको बताउनुभयो । उहाँका अनुसार घाइतेहरु हुनेमा बागचौर नगरपालिका वडा न १ का निवासी अन्दाजी १४ वर्षीय आयुस बस्नेत, २२ वर्षीय मनोज वस्नेत, बानपा २ का अन्दाजी २७ वर्षीय सीता वली, २८ वर्षीय बविता रावल र निजको ११ वर्षीय छोरी एसिका रेउले तथा गाडी चालक बानपा २ का १९ वर्षीय हिक्मत पुन मगर छन ।
बबिताको अवस्था गम्भीर भएपछि थप उपचारका लागि नेपालगन्ज रिफर गरिएको प्रहरीले जनाएको छ । यस्तै, बानपा २ कै १९ वर्षीय अर्जुन केसीको अवस्था सामान्य छ । उनको कपुरकोट स्थित स्थानीय मेडिकलमा उपचार भइरहेको प्रहरीले जनाएको छ । गाडी सडकबाट एक सय मिटरभन्दा तल खोल्सामा खसेको छ । दुर्घटनाको कारण खुल्न सकेको छैन । घटना बारे थप अनुसन्धान भइरहेको प्रहरीले जनाएको छ ।
राप्ती लोकमार्गको कपुरकोट ३ स्थित मूलपानी बनस्पति उद्यान नजिकै भएकाे दुर्घटना