तरकारी खेती र पशुपालनबाट मासिक ४० हजार रुपियाँ आम्दानी

सिराज खान
नेपालगञ्ज, मङ्सिर ३ गते । नेपालगञ्ज २० पशुपतिनगरका निर्मला सापकोटाले घर खर्चका लागि शुरु गरेको तरकारी उत्पादन र पशुपालनबाट मासिक ४० हजार रुपियाँ बढी आम्दानी गरिरहनुभएको छ ।

शुरुमा घर खर्चका लागि तरकारी उत्पादन र पशुपालन गरेपनि पछि उत्पादन बढेर विक्रि हुन थालेपछि व्यवसायिक बनाउँदै लगेर अहिले मासिक ४० हजार आम्दानी गरिरहेको सापकोटाले बताउनुभयो ।

२०६२ सालमा घर खर्चकालागि टमाटर, भन्टा, बन्दा, काउली र खुर्सानी रोपेर शुरु गरेको तरकारी उत्पादन अहिले दुई विगाहा जग्गामा फैलिएको उहाँले बताउनुभयो । यसैगरी दुधका लागि भैंसीपालन गरेको र अहिले पाँच भैँसी र दुई गाईले दिएको दुध बिक्रि गरिरहेको सापकोटाको भनाई छ ।

दुध र तरकारी बेचेर मासिक ४० हजार आम्दानी भैरहको उहाँले बताउनुभयो । सोही आम्दानीले जस्तापाताले छाएको चार कोठे घर बनाएको र पाँच परिवारको राम्ररी गुजरा चलिरहेको उहाँले बताउनुभयो ।

अबको तीन बर्षमा तीन कोठे पक्की भवन बनाउने लक्ष्यकासाथ अगाडि बढेको जनाउँदै सापकोटाले आँट गर्ने हो भने महिलाले पनि पुरुषसरह काम गर्न सक्छन् भन्ने प्रमाणित भएको बताउनुभयो । उहाँको परिवारले चैते मकै खेती र बर्षाको समयमा धानखेती पनि गर्ने गर्नुभएको छ ।

कोषा विक्रि गर्न चैते मकै खेती गरेको उहाँले बताउनुभयो । ‘चैते मकै बारीबाट विक्रि हुन्छ । मकैबाट बार्षिक झण्डै ५० हजार रुपियाँ आम्दानी गर्छौँ,’ निर्मलाले भन्नुभयो । त्यसैगरी उहाँले हिउँद र गर्मी याममा तरकारी खेती गर्ने दुई विघा खेतमा धान रोप्नेगरेको बताउनुभयो । कम्पोष्ट मल प्रशस्त भएकाले धान राम्रो फल्ने उहाँले बताउनुभयो । यसले रासायनिक मल खरिद गर्ने पैँसा बचत हुने उहाँले जानकारी दिनुभयो ।

बर्षमा ३० क्वीन्टल धान फलाउने गरेको उहाँले बताउनुभयो । उत्पादन भएको धान बर्षभरी खान पुग्ने उहाँले बताउनुभयो । ‘धान विक्रि गरेर हामीले झण्डै ६० हजार रुपियाँ बचत गर्छौँ । पशुपालन, मकै, धान र तरकारी खेतीबाट बार्षिक करिव पाँच लाख रुपिँया आम्दानी हुन्छ,’ उहाँले थप्नुभयो ।