चक्कु प्रहार गरेको अभियोगमा पक्राउ

 

गोरखापत्र अनलाइन
काठमाडौं, पुस ३ गते । चक्कु प्रहार गरेको अभियोगमा प्रहरीले एक जनालाई पक्राउ गरेको छ । बारा जिल्लाको कलैया घर भएका १९ वर्षीय विकास सरावलाई शुक्रबार प्रहरीले चक्कु प्रहार गरेको अभियोगमा स्वयम्भुबाट पक्राउ गरेको हो ।

शुक्रबार साँझ काठमाडौं–१३ छाउनीमा बा १ ज १४४६ नं को ट्याक्सी चालक काभ्रेको रोशी गाउँ पालिका–२ घर भई हाल डल्लु बस्ने ३८ वर्षीय कृष्णबहादुर लामालाई त्यही ट्याक्सीमा सवार रहेका सरावले चक्कुले घाँटीमा प्रहार गरेको प्रहरीले जनाएको छ ।

चक्कु प्रहार गरेको सूचनाअनुसार प्रहरी वृत्त स्वयम्भुको टोली खटेर घाईते ट्याक्सी चालकलाई उपचारका लागि मनमोहन मेमोरियल अस्पताल स्वयम्भुमा लगेको थियो । अहिले थप उपचार ट्रमा सेन्टरमा भइरहेको प्रहरीले जनाएको छ ।