हराएको महिलाको शव पोखरीमा भेटियो

 

नगेन्द्रकुमार कर्ण
जलेश्वर, पुस ६ गते । महोत्तरी जिल्लाको मटिहानी नगरपालिकाको वडानं. ३ मा तीन दिनदेखि हराएकी एक महिलाको शव पोखरीमा भेटिएको छ । मटिहानी नगरपालिका वडानं.३ बरदाहा बस्ने फजेल राइनकी श्रीमती वर्ष २२ की रुकसाना खातुनको शव घर नजिकैको पोखरीमा तीन दिनपछि भेटिएको हो ।

जिल्ला प्रहरी कार्यालय महोत्तरीका प्रहरी नायव उपरीक्षक प्रकाश विष्टले पुस २ गतेदेखि रुकसाना हराएको सूचना प्राप्त भएको र खोजतलासकै क्रममा उनको शव सोमबार साँझ घर नजिकैको पोखरीमा मृत अवस्थामा फेला परेको बताउनुभयो ।

मानसिक अवस्था राम्रो नभएको रुकसाना बेला बेलामा घरबाट हराउने, भाग्ने गरेको हुँदा उनको मृत्यु डुबेर भएको प्रारम्भिक अनुसन्धानले देखिएको बताइएको छ ।
प्रहरी कार्यालयका प्रवक्ता समेत रहनुभएका विष्टले अनुसन्धान भइरहेकाले अहिले नै विस्तृत भन्न नसकिने बताउनुभयो ।

भारत माइती भएकी रुकसाना मानसिक अवस्था राम्रो नभएकै कारण यसअघि पनि पटक पटक घरबाट गायब हुने गरेकी थिइन् ।