बोलेरो दुर्घटनामा एकको मृत्यु

बावुराम देवकोटा
सिन्धुलीमाढी, पुस ८ गते । बीपी राजमार्ग अन्तर्गत सिन्धुलीको सुनकोसी गाँउपालिका–६ रिठ्ठेभिर नजिक बिहीबार बिहान कुखुरा बोकेको बोलेरो दुर्घटना हुँदा एक जनाको मृत्यु भएको छ ।

उक्त गाडीमा सवार तीन जनामध्ये एक जनाको घटनास्थलमै मृत्यु भएको र अरु दुई जना घाइते भई उनीहरुको धुलिखेल अस्पतालमा उपचार भइरहेको जिल्ला प्रहरी कार्यालय सिन्धुलीले जनाएको छ । कार्यालयका अनुसार मृत्यु हुनेमा लालबन्दी नगरपालिका–१५ परवानीपुर निवासी २० वर्षीय कुन्थाङ मोक्तान छन् ।

त्यस्तै, घाइतेहरु सोही ठाँउ निवासी गाडी चालक ३० वर्षीय आइतसिंह बम्जन र २१ वर्षीय मनीष परियारको धुलिखेल अस्पतालमा उपचार भइरहेको कार्यालयका प्रहरी नायब उपरीक्षक मनोजकुमार लामाले जानकारी दिनुभयो ।

बर्दिबासबाट काठमाडाैं जाँदै गरको प्रदेश २–०२–००१ च ४००८ नम्बरको बोलेरो सडकबाट करिब अन्दाजी दुई सय फिट तल खसी दुर्घटना भएको कार्यालयले जनाएको छ । घटनाका विषयमा थप अनुसन्धान भइरहेको पनि प्रहरीले जनाएको छ ।