जीप दुर्घटनामा एक जनाको मृत्यु

कमल शर्मा
दैलेख, पुस २१ गते । जिल्लाको भगवतिमाई गाउँपालिका वेस्तडादेखि दैलेख बजार आउँदैगरेको जीप दुर्घटना हुँदा एक जनाको मृत्यु र आठ जना घाइते भएका छन । लु २ च ४८२९ नम्बरको जिप नारायण नगरपालिका– ११ लोहोरेमा बुधवार बिहान करिब ९ बजे दुर्घटना भएको हो । दुर्घटनामा जीपचालक भगवतिमाई–६ घर भई भगवतिमाई गाउँपालिका बेस्तडा बस्ने वर्ष २९ को कृष्ण रोकायाको मृत्यु भएको जिल्ला प्रहरी कार्यालय दैलेखका प्रमुख भुवनेश्वरप्रसाद शाहले जानकारी दिनुभयो ।

जीपमा सवार बर्दिया माझगड बस्ने वर्ष ६९ को नरबहादुर बुढा, भगवतिमाई गाउँपालिका –६ बस्ने वर्ष २३ को गीता शर्मा, भगवतिमाई गाउँपालिका –१ का वर्ष ३५ को कल्पना रोकाया, भगवतिमाई गाउँपालिका ६ बस्ने वर्ष २० को प्रेमबहादुर बिसी, वर्ष ३२ को कृष्णबहादुर बुढा, वर्ष १९ को दशरथ सिंह, वर्ष २८ को बमबहादुर बिसी, वर्ष २४ को मिना अधिकारी घाईते भएका छन् । तीन जनाको अवस्था गम्भिर रहेको प्रहरीको भनाई छ ।

जीप दुर्घटनामा सामान्य घाईते भएकाहरुको जिल्ला अस्पतालमा उपचार भइरहेको प्रहरीले जनाएको छ । तीन जना गम्भिर घाईतेलाई थप उपचारका लागि प्रदेश अस्पताल सुर्खेत रिफर गरिएको शाहले जानकारी दिनुभयो । दुर्घटना भएको जीप सडकभन्दा सय मिटर तल खसेको छ ।