बसको ठक्करबाट पैदल यात्रीको मृत्यु
विजयकुमार साह
ढल्केबर, माघ ११ गते । धनुषाको गणेशमान चारनाथ नगरपालिका–६ स्थित पूर्वपश्चिम लोकमार्ग बसले ठक्कर दिँदा एक जना पैदलयात्रीको मृत्यु भएको छ ।
सोमबार राति १० बजे काठमाडौंबाट ताप्लेजुङ्गतर्फ गइरहेको ना७ख ७४४३ नम्बरको बसले पैदल हिँडिरहेका गणेशमान चारनाथ नगरपालिका ६ गोदार बस्ने ६५ वर्षीय राजेन्द्रप्रसाद जैसवाललाई ठक्कर दिँदा मृत्यु भएको इलाका प्रहरी कार्यालय ढल्केवरका प्रहरी निरीक्षक प्रदीप सुवेदीले बताउनुभयो ।
बसको ठक्करबाट गम्भीर घाइते भएका जैसवालको उपचारको क्रममा प्रादेशिक अस्पताल जनकपुरधाममा मृत्यु भएको उहाँले जानकारी दिनुभयो ।
जैसवालको शव पोष्टमार्टमका लागि अस्पतालमा राखिएको र घटनामा संलग्न बससहित ताप्लेजुङ्गको पाथिभरा याङ्गरुख नगरपालिका बस्ने वर्ष २८ को सन्तोष तामाङ्गलाई नियन्त्रण लिएको प्रहरी निरीक्षक सुवेदीले भन्नुभयो ।