उपमेयर चढ्ने गाडीको ठक्करबाट एक जनाको मृत्यु

लीला झापाली
बिर्तामोड, माघ १३ गते । झापा मेचीनगर नगरपालिकाका उपमेयर चढ्ने गाडीको ठक्करबाट मोटरसाइकल चालकको मृत्यु भएको छ । नगरपालिकाको मे १ झ १७२ नम्बरको स्करपियो गाडीको ठक्करबाट मेचीनगर ७ का ३५ वर्षीय सन्तोष राजवंशीको मृत्यु भएको जिल्ला प्रहरी कर्यालय झापाले जनाएको छ ।

सो स्कारपियोले मे ९ प ७९२७ नम्बरको मोटरसाइकललाई बुधबार साँझ ७ बजे मेचीनगर ७ स्थित टोकला चिया बगान अगाडि ठक्कर दिई घाइते बनाएको थियो । घाइतेको उपचारका क्रममा राती साढे ७ बजे निधन भएको जिल्ला प्रहरी कार्यालय झापाका प्रहरी प्रवक्ता प्रहरी नायब उपरिक्षक वसन्त पाठकले बताउनुभयो ।

ठक्कर दिने गाडी र चालक मेचीनगर नपा ७ का ४८ वर्षीय राजकुमार प्रधानलाई इलाका प्रहरी कार्यालय काँकरभिट्टाले नियन्त्रणमा लिएको प्रहरीले जनाएको छ ।