सुन्तला बेचेर साढे दुई करोड रुपियाँ आम्दानी

नवीन शिशिर विक
बागलुङ, माघ १५ गते । बागलुङ नगरापालिका– ८ सिगानाका सुन्तला उत्पादक कृषकले यस बर्ष सुन्तला विक्रीबाट करिव साढे दुई करोड रुपियाँ गाउँ भित्र्याउन सफल भएका छन् । सुन्तला उत्पादनको लागि मौसम प्रतिकुल तथा विक्री गर्ने बेला औसा कीराको प्रकोप भए पनि राम्रा राम्रा छनोट गरेर विक्री गर्दा सो रकम गाउँ भित्रिएको हो । यस बर्ष सिगानाको केही कृषकले आफै पोखरा लगेर विक्री गरेको बताएका छन् । कसैको सुन्तला बगैचामा व्यापारीले खरिद गरेर लगेको बताएका छन् ।

व्यापारिले सुन्तला बगैचामै गएर खरिद गर्दा प्रतिकिलो ६० रुपियाँ दिएपछि आफै पोखरा लगेर विक्री गर्दा प्रतिकिलो १२० रुपियाँसम्म विक्री गर्न सकिएको सुन्तला उत्पादक कृषक अनन्त खडकाले बताउनुभयो । यो वर्ष सुन्तला विक्रीबाट साढे चार लाख रुपियाँ आम्दानी गरेको उहाँले बताउनुभयो ।

सुन्तला टिप्ने ज्याला र यातायात खर्च घटाउँदा चार लाख रुपिययाँ खुद आम्दानी भएको खडकाको भनाइ छ । खडकाको सुन्तला बगैचामा दुई सय विरुवा रहेको उहाँको भनाइ छ । खडकाले सुन्तला पोखरा लगेर विक्री गर्नुभएको बताउनुभयो । सो स्थानका कृषक रामबहादुर खडकाले पनि यो बर्ष दुई लाख रुपियाँका सुन्तला विक्री गरेको बताउनुभयो । बर्षात र औसा किराको प्रकोपले उत्पादन र विक्रीमा समस्या भएको खडकाको भनाई छ ।

सिगाना सुन्तला उत्पादनको पकेटक्षेत्र र व्यावसायिक उत्पादन तथा छिटफुट सुन्तला उत्पादक कृषकले यो वर्ष साढे दुई करोड रुपियाँमा सुन्तला बेचेको वडाध्यक्ष जितबहादुर जिसीले बताउनुभयो । वडा कार्यालयले यस बर्ष पाँच करोडको सुन्तला विक्री हुने अनुमान गरेको थियो । मौसम प्रतिकूल हुँदा लक्ष्यअनुसारको सुन्तला उत्पादन हुन कठिन भएको अध्यक्ष जिसीको भनाइ छ ।

सिगानामा पछिल्लो पाँच बर्षमा तीस हजार सुन्तलाका विरुवा रोपिएका थिए । नयाँ विरुवा हुर्केर फल दिन पाँच वर्ष लाग्ने हुँदा बागलुङ नगरपालिकाले कृषकलाई सुन्तला बिरुवा रोपेको जग्गाको क्षेत्रफलअनुसार अनुदान रकम उपलब्ध गराएको छ ।

अन्न उत्पादनका हिसाब गरेर अनुदान दिएको नगरप्रमुख जनकराज पौडेलको भनाइ छ । सो क्षेत्रका करिव एक सयजना कृषक सुन्तला खेतीमा आबद्ध छन् । बगैचामा घटीमा दशदेखि बढीमा दुई सय सुन्तलाका बिरुवा छन् । नगरपालिकाले यो बर्ष दुई हजार सुन्तला र दुई हजार कागतीका बिरुवा अनुदानमा वितरण गरेको थियो ।