तुवाँलोका कारण काठमाडाैंबाट हुने आन्तरिक उडान ठप्प

काठमाडौं, माघ २० गते । बाक्लो तुवाँलोका कारण बिहानैदेखि आन्तरिक उडान ठप्प भएको छ । बिहान ६ः३० बजेदेखि त्रिभुवन अन्तराष्ट्रिय विमानस्थलबाट देशैभर हुने आन्तरिक उडान भिजिबिलिटी अपुग हुँदा उडान हुन सकेको छैन ।

हाल त्रिभुवन अन्तराष्ट्रिय विमानस्थलको भिजिबिलिटी एक हजार दुई सय मिटर मात्र रहेको विमानस्थलले जनाएको छ । पश्चिमी वायुको प्रभावका कारण बिहीबार बिहानैदेखि मौसममा खरावी आएपछि बिहान नौ बजेसम्म देशैभरका ३५ वटै विमानस्थलमा उडान ठप्प छ ।
विमानस्थलका प्रवक्ता टेकनाथ सिटौलाका अनुसार पहाडी क्षेत्रका केही विमानस्थल खुलेपनि तराई क्षेत्रका विमानस्थल खुल्न सकेको छैन । तर काठमाडौं विमानस्थलका लागि पाँच हजार मिटर भिजिबिलिटी आवश्यक रहे पनि एक हजार दुई सय मिटर मात्र रहेको विमानस्थलले जनाएको छ । बिहीबारका लागि एक सय १२ वटा नियमित उडान तोकिएको छ ।