एक दशकपछिमा सल्यानमा भारी हिमपात

प्रतीक इच्छुक शर्मा
सल्यान, माघ २१ गते । सल्यानका माथिल्नो क्षेत्रमा हिमपात भएको छ । हिमपातले जनजीवन कष्ठकर बनेको छ । जिल्लाका उच्च क्षेत्रमा हिमपात भएको हो । उच्च क्षेत्रमा हिमपात र अन्य क्षेत्रमा निरन्तर वर्षा भएका कारण चिसो निकै बढेको छ ।

यहाँका बाफुँखोला, बुराँसे, जथाक, खर्सुबास, बथान, पातिहाल्न, निगालचुला, कुमाख लगायतका स्थानमा बाक्लो हिमपात भएको छ ।

बाक्लो हिमपातका कारण घरबाहिरबाट निस्कन समस्या भएको बागचौर नगरपालिका –९ बथानका मदन शर्माले बताउनुभयो । उहाँका अनुसार हिमपातले गर्दा पशुचौपायलाई के खुवाउने भन्ने चिन्ताले पिरोलेको छ ।

चिसोले जिल्लावासीको जनजीवन कष्टकर बनेको छ । हिमपात र वर्षाले मानिससँगै पशुचौपायालाई समस्या भएको छ । वर्षमा एक दुई पटक हिउँ पर्ने गरेको भएपनि यो वर्ष भने यसपटक समेत गरी तीन पटक हिमपात भएको छ । छत्रेश्वरी गाउँपालिका २ दमाचौर गुराँसेका चित्रवहादुर केसीले यो पटक धेरै हिमपात भएको बताउनुभयो । उहाँका अनुसार १० वर्ष पहिले धेरै हिउँ परेको र यसपटक हिमपात धेरै भएको छ ।

हिउँ पर्दा जनजीवन कष्ठकर भएपनि किसान भने खुसी भएका छन् । उच्च भूभागमा लगाईने अन्नवाली, तरकारीका लागि हिमपात उपयोगी हुने किसानको भनाइ छ । दमाचौरका तेजबहादुर योगीले खेतीपातीका लागि सिंचाई आवश्यक भएकाले समयमा हिमपात हुँदा यसपटक उत्पादन बढ्ने बताउनुभयो ।