खुर्पा प्रहार गरी श्रीमतीको हत्या
नवीन शिशिर विक
बागलुङ, माघ २९ गते । पर्वतको कुश्मा नगरपालिका–४ डम्डारेखोलामा एक व्यक्तिले खुर्पा प्रहार गरी श्रीमतीको हत्या गरेका छन् ।
बागलुङ नगरपालिका–६ स्थायी घर भई कुश्मा बजारमा बस्दै आएका ४३ वर्षीय राजु परियारले ४१ वर्षीया श्रीमती सीता परियार खुर्पा प्रहार गरी हत्या गरेका हुन् ।
जिल्ला प्रहरी कार्यालय पर्वतका प्रहरी निरीक्षक राजेन्द्र अधिकारीका अनुसार मृतक परियारको शरीरमा निलडाम र टाउकोमा धारिलो हतियारको निसान थियो । उहाँकाले घटना शुक्रबार भएको जानकारी दिनुभयो ।
आरोपी राजु परियारलाई नियन्त्रणमा लिएको र घटनास्थलबाट खुर्पा बरामद गरेको उहाँले बताउनुभयो ।
दुवै जना यसअघि पनि पटक–पटक झगडा गरेर सामुदायिक सेवा केन्द्र र महिला तथा बालबालिका सेवा केन्द्रमा आउने र मेलमिलापपछि फर्कने गर्दै आएका थियो ।
घटना हुनुअघि परियारले मदिरा सेवन गरेको प्रहरीको भनाइ छ । उनीहरुका एक छोरा र एक छोरी छन् । परियारविरुद्ध मृतकका आफन्तले किटानी उजुरी दिएका छन् ।
शनिबार पोस्टमार्टमपछि शव मृतकका आफन्तलाई बुझाइएको र घटनाबारे थप अनुसन्धन भइरहेको प्रहरी निरीक्षक अधिकारीले जानकारी दिनुभयो ।