घर अगाडिबाटै चार वर्षीया बालिका बेपत्ता

विजयकुमार साह
ढल्केबर, चैत ११ गते । धनुषाको जनकपुरधाम उपमहानगरपालिका–१६ पुलचौकबाट एक बालिका बेपत्ता भएकी छन् । धुव्र मण्डलकी चार वर्षीया छोरी सृष्टि मण्डल बिहीबार साँझ घर अगाडिबाटै बेपत्ता भएकी हुन् ।

बेपत्ता बालिकाकी मामा पर्ने रामशङ्कर मण्डलले बिहीबार साँझ ७ बजेतिर घरको मुख्य प्रवेशद्वारमै खेलिरहेको बेला बेपत्ता भएको जानकारी दिनुभयो । बालिका हराएको घटनाबारे जिल्ला प्रहरी कार्यालय धनुषामा जानकारी गराएको र आफू पनि सीमाक्षेत्रमा तैनाथ सुरक्षाकर्मीलाई भेटेर बालिकाको हुलियासहितको तस्बिर उपलब्ध गराएको मण्डलले भन्नुभयो ।

जिल्ला प्रहरी कार्यालय धनुषाका प्रवक्ता तथा प्रहरी उपरीक्षक जितेन्द्रकुमार बस्नेतले बालिका हराएको घटनाबारे थाहा पाउने बित्तिकै मातहतका प्रहरीसहित अन्य सुरक्षा निकायसँग समन्वय गरी खोजी कार्यमा जुटेको बताउनुभयो । बेपत्ता बालिकाको अवस्थाबारे शुक्रबार बिहानसम्म कुनै प्रमाण फेला पर्न सकेको छैन ।

बेपत्ता बालिकाको बुवाआमाको घर धनुषा जिल्लाको कमला नगरपालिका–२ मा घर भएपनि पुलचौकमा डेरी भाडा गरी बस्दै आउनुभएको छ ।