स्वास्थ्य संस्थामा शिशु जन्माउनेलाई आठ हजार आठ सय 

दोलखा, पुस ३ गते । नियमितिरूपमा जाँच गरी स्वास्थ्य संस्थामा बच्चा जन्माउने आमालाई तत्कालै मेलुङ गाउँपालिकाले रु आठ हजार ८०० दिने गरेको छ । आर्थिक वर्ष २०७७-०७८ को शुरुदेखि नै गाउँपालिकाले सङ्घीय सरकारले प्रदान गर्ने रु तीन हजार ८०० मा रु पाँच हजार थप गरेर सो रकम दिने गरेको हो ।    
    
सुत्केरी स्याहार खर्च र सुत्केरी पोषण खर्चका नाममा पालिकाका सबै वडामा सो रकम वितरण गरिँदै आएको छ । हालसम्ममा १०० जनालाई वितरण गरेको गाउँपालिकाका अध्यक्ष नरबहादुर श्रेष्ठले बताउनुभयो । सुरक्षितरूपमा बच्चा जन्माएर बालमृत्युदर र मातृ मृत्युदर कम गर्ने उद्देश्यले जिल्लामै यो नमुना नमुना काम सो गाउँपालिकाले गर्दै आएको छ ।    
    
मृतकको घरमै किरिया खर्च    
    
उक्त गाउँपालिकाभित्र जुनसुकै कारणले मृत्यु भएकाका परिवारलाई तत्काल रु पाँच हजार दिने गरेको छ । वडा सचिवमार्फत आफ्नो क्षेत्रभित्र मृत्यु भएका परिवारलाई तत्काल सहयोग पुगोस् भन्ने उद्देश्यले घरमै पु¥याइदिने गरेको हो । समाजलाई समाजिक रूपान्तरण गर्ने कुराको महशुस गर्दै गाउँँपालिकाको छैठौँ गाउँँसभा अधिवेशनबाट सो रकम दिँदै आएको अध्यक्ष श्रेष्ठले बताउनुभयो ।    
    
आव २०७७-७८ बजेट नीति तथा कार्यक्रममा किरिया खर्चका लागि रु पाँच लाख र सुत्केरी पोषण खर्चका लागि रु पाँच लाख विनियोजन गरेकामा यसले नपुग्ने देखिएकाले आगामी हिउँदे अधिवेशनमा रु पाँच÷पाँच लाख थप गर्ने गाउँपालिकाकोले जनाएको छ ।