मोटरसाईकलबाटै पहिलो पटक मानसरोवर कैलाश दर्शन

राजन रावत
हुम्ला असोज १३ गते । हवाई जहाजमा ढुवानी गरेर ल्याएका मोटर साइकलबाट नेपाली भुमि लाप्चा पुगेर मानसरोवर कैलाशको दर्शन सुरु भएको छ । परिक्षणका रुपमा मोटरसाइकलबाट यात्रा गर्नुभएका दुई जना आन्तरिक पर्यटकहरुले दश घण्टामा लाप्चा पुगेर दर्शन गर्नुभएको हो ।

आन्तरिक पर्यटक बखत खड्काले मोटर साईकलमा गएर लाप्चा पुगी मानसरोवर कैलाशको दर्शन गर्न सफल भएको बताउनुभयो । यसअघि दैपल वा गाडीमार्फत यात्रा गरी दर्शन भइरहेका बेला पहिलो पटक उहाँको टोलीले मोटरसाइकलबाट यात्रा गरेको हो ।

सिमकोटबाट बिहान आठ बजे मोटरसाइकलमा हिडेको टोली बेलुका ४ बजे लिमीको तुम्लिङ पुग्न सफल भएको बताउनुभयो । लाप्चा क्षेत्रको पाँच हजार मिटर अग्लो स्थानमा मोटरसाइकलमा गुड्दाको आनन्द अर्कै हुने उहाँले अनुभव सुनाउनुभयो । कच्ची सडक र धुलोले यात्रामा केही समस्या भएपनि समय भने कम लाग्ने उहाँले बताउनुभयो । आर्थिक रुपमा पनि मितव्ययी हुने गरेको उहाँको अनुभव छ ।

तुम्लिङखोला तर्ने बेला केही समस्या हुने बाहेक अन्य ठाउँमा यात्रा आरामदायी र सहज भएको उहाँले बताउनुभयो । मोटरसाइकलको यात्राले लाप्चाबाट मानसरोवर कैलाश दर्शनको यात्राले अन्य आन्तरिक तथा बाह्य पर्यटकहरुलाई सहज भएको छ । पहिलो मोटरसाइकल यात्रा सफल भएपछि चार जोडी अन्यले पनि लाप्चा यात्रा तय गर्नुभएको छ ।