न्युजिल्याण्ड भ्रमणमा पाकिस्तान क्रिकेटका छ जनामा सङ्क्रमण

गोरखापत्र अनलाइन
काठमाडौं, मंसिर ११ गते । न्युजिल्याण्ड भ्रमणमा रहेको पाकिस्तान क्रिकेटका छ जनामा कोरोना सङ्क्रमण भएको छ । चार जना नयाँ र दुई जना सङ्क्रमित अवस्थामै न्युजिल्याण्ड आइपुगेको जनाइएको छ ।
न्युजिल्याण्ड क्रिकेटले एक वक्तब्य जारी गरी मंगलबार न्युजिल्याण्डमा अवतरण गरेपछि भ्रमण दलका सदस्यको स्वाब संकलन गरिएकोमा छ जनामा सङ्क्रमणको पुष्टि भएको उल्लेख गरेको छ । भ्रमण दलका प्रत्येक सदस्यले आइसोलेशनमा बस्दा चार पटक कोरोना परीक्षण गराउनुपर्नेछ ।
सङ्क्रमित भएका छ जनालाई क्राइस्टचर्चमा व्यवस्था गरिएको क्वारेन्टिनमा बस्नुपर्नेछ ।
न्युजिल्याण्ड क्रिकेटले पाकिस्तान क्रिकेट टोलीका केही सदस्यले अवतरण गरेको पहिलो दिनमै स्वास्थ्य मापदण्डको उल्लघंन गरेको पाइएकोले उनीहरुलाई आवश्यक मापदण्डको पूर्ण पालनाको लागि सहयोग गर्न आग्रह गरेको जनाएको छ । न्युजिल्याण्डको स्वास्थ्य मन्त्रालयले भने स्वास्थ्य मापदण्डको उल्लघंन गरेको सीसीटीभीमा कैद भएकोले भ्रमण दललाई अन्तिम चेताबनी दिइएको वक्तब्य जारी गरेको छ ।
पाकिस्तानले न्युजिल्याण्डमा डिसेम्बर १८ देखि सुरु हुने गरी तीन टी ट्वान्टी र माउन्ट मौगनुईमा दुई टेष्ट श्रृंखला खेल्नेछ ।