सोसिडाडलाई हराउँदै एटलेटिको मड्रिड शीर्षस्थानमा उक्लियो

गोरखापत्र अनलाइन
काठमाडौं, पुस ८ गते । एटलेटिको मड्रिड स्पेनिस ला लिगाको शीर्षस्थानमा उक्लेको छ । तेस्रो स्थानको रियल सोसिडाडमाथि जित हात पार्दै एटलेटिको शीर्षस्थानमा उक्लिन सफल भएको हो ।
गए राति सम्पन्न खेलमा एटलेटिकोले सोसिडाडमाथि २–० को जित हात पार्यो । ४९ औं मिनेटमा एटलेटिकोका लागि मारियो हरमोसोले गोल गर्दै १–० को अग्रता दिलाउनुभयो । ७४ औं मिनेटमा दोस्रो गोल गर्दै मार्कस लोरेन्टेले एटलेटिको अग्रता दोब्बर पार्नुभयो ।
एटलेटिकोले १३ खेलबाट ३२ अङ्क बटुलेको छ । दोस्रो स्थानको रियल मड्रिडले १४ खेलबाट २९ तथा रियल सोसिडाड २६ अङ्क छ । १४ खेलबाट २४ अङ्क बटुलेको बार्सिलोना पाँचौं तथा १५ खेलबाट २६ अङ्क बटुलेको भिलारेल चौथो स्थानमा छ ।